თბილისში, განსაკუთრებით დიდი ოდენობით ნარკოტიკული საშუალებების უკანონო შეძენა-შენახვის ბრალდებით, ორი პირი დააკავეს.

შსს-ს ინფორმაციით, ამოღებული ნარკოტიკების საბაზრო ღირებულება შავ ბაზარზე ნახევარ მილიონამდე ლარს შეადგენს. ბრალდებულების საცხოვრებელი სახლის ჩხრეკისას, 4 200 აბი ნარკოტიკული საშუალება ექსტაზი და დიდი ოდენობით სხვა საშუალებები: მდმა, ჰაშიში, კოკაინი და მარიხუანა ამოიღეს.

"დაკავებულები ინტერნეტ-ნარკომაღაზიებს ფლობდნენ, როგორც ერთ-ერთ ინტერნეტ ნარკოპლატფორმაზე, ასევე, სოციალურ აპლიკაცია ტელეგრამში. აღნიშნული ონლაინ მაღაზიები სხვადასხვა სახის ე.წ. კლუბურ ნარკოტიკს ასაღებდნენ. სამართალდამცველებმა, დაკავებულების პირადი ჩხრეკისას, ადგილზე სარეალიზაციოდ განსათავსებლად გამზადებული 180 აბი ნარკოტიკული საშუალება ექსტაზი ამოიღეს. ასევე, ამოღებულია დიდი ოდენობით ნაღდი ფული: 7 200 აშშ დოლარი, 3 520 ევრო, 376 200 რუსული რუბლი, 585 თურქული ლირა და 200 ლარი", — აცხადებენ უწყებაში.

საქმეზე გამოძიება საქართველოს სისხლის სამართლის კოდექსის 260-ე მუხლის მე-3 ნაწილის "ბ" ქვეპუნქტით და მე-6 ნაწილის "ა" ქვეპუნქტით მიმდინარეობს. ეს მუხლი წინასწარი შეთანხმებით დიდი ოდენობით ნარკოტიკული საშუალების, მისი ანალოგის, პრეკურსორის ან ახალი ფსიქოაქტიური ნივთიერების უკანონო დამზადებას, წარმოებას, შეძენას, შენახვას, გადაზიდვას, გადაგზავნასა ან გასაღებას გულისხმობს.