გარდაცვლილი 15 წლის ლუკა სირაძის დედა, ელიკო ჩხიტუნიძე იხსენებს, რომ დაკითხვის დროს გამომძიებელი მარიანა ჩოლოიანი ბავშვს "კისრის მოგრეხვით" ემუქრებოდა და დანაშაულების აღიარების მიზნით მას აშანტაჟებდა. ამასთან, დედა ამბობს, რომ განყოფილებაში მყოფი სხვა პირებისგან გინება ისმოდა.

"უმტყუნა იმ სიძლიერემ და გატყდა კი არა ბავშვი, არ ვიცი, ალბათ, წაშლილი იყო", — იხსენებს სირაძის დედა", — ამბობს ელიკო ჩხიტუნიძე.

გადაცემა პოლიტმეტრში დედამ გაიხსენა განყოფილებაში დაკითხვის პროცესი. მისივე თქმით, იქ რამდენიმე საათი იყვნენ და ამ ხნის განმავლობაში ბავშვი არაერთხელ გახდა ზეწოლის მსხვერპლი.

"გაბრაზებით ეუბნება, ვაჟბატონო არ იცი რისთვის დაგიბარე, რა გააფუჭეო. არ ვიციო, ლუკამ უთხრა. შენ გააფუჭე კედლები, გააფუჭე დაფა, გააფუჭე ჟურნალიო. მე არ გამიფუჭებიაო. მარიანამ უთხრა, ვიდეომასალაც მაქვსო, აგერ წარმომადგენელი ამბობს სკოლის, რომ შენ გააფუჭე, მოსწავლეებიც ამბობენ, რომ შენ გააფუჭე. ლუკამ უთხრა, არ გამიფუჭებია, არავის დავუნახივარ და როგორ იტყვიან, რომ მე გავაფუჭეო. მარიანამ უპასუხა, რომ მე მყავს მოწმეები, აღიარე ახლა, რომ შენი გაკეთებულიაო. ისე ხმამაღლა ელაპარაკებოდა, კისერს მოგიგრეხ, შენისთანებისთვის ბევრისთვის მომიგრეხია კისერი, დროზე აღიარეო. [...]

მარიანა ცდილობდა, ბავშვი გაეღიზიანებინა, წყობილებიდან გამოეყვანა და მოახერხა კიდეც. ბავშვი ჭკუაზე არ იყო, ისე ნერვიულობდა. უკვე რომ გაბრაზდა ლუკა, კიდევ დაიწყო შანტაჟი — შენი საქციელით, შენი მანერებით, გადახოტრილი თმებით, კაპიუშონიანი რომ გაცვია, შენ ხარ გამკეთებელი, იცი შენ სად გიკრავთ თავსო, სადაც საჭიროა იქ და იქ მოგხედავენო. მერე შევშინდი ძალიან, ავნერვიულდი ტირილი დავიწყე", — ყვება ლუკა სირაძის დედა.

ელიკო ჩხიტუნიძე ამბობს, რომ განყოფილების უფროსის მოადგილემ, რევაზ მამასახლისმა ლუკა თავის ოთახში მშობლის გარეშე შეიყვანა. დედა ვარაუდობს, რომ ოთახში ყოფნის დროს ბავშვს სახეში გაარტყეს.

დედა იხსენებს, რომ დაკითხვის შემდეგ ლუკა სახლიდან გავიდა და გააფრთხილა, რომ იმ ღამით სახლში არ დაბრუნდებოდა. ელიკო ჩხიტუნიძის თქმით, თავიდან ბავშვის მოსაძებნად ისევ მარიანა ჩოლოიანს დაურეკა, თუმცა მან უთხრა, რომ უფროსი შვილისთვის, ბექასთვის დაერეკა, რომელიც გორში სამხედრო აკადემიაში იყო.

"დავრეკე თავისთავად ბექასთან, ბექამ აქეთ ძმაკაცებს გადმოურეკა, მთელი უბანი ეძებდა ამ ბავშვს და მოხდა ის, რაც მოხდა. ეს ამბავი თვითონაც რომ გაუგია, მერე მირეკავს [მარიანა], რომ არსად გამოჩნდა ლუკაო, თუ გამოჩნდეს გამაგებინეო. მერე რომ მომიკლა ბავშვი, მეუბნება, თუ გამოჩნდეს, გამაგებინეო", — იხსენებს დედა.

15 წლის ლუკას საქმე

15 წლის ბიჭი, რომელიც დაკითხვის შემდეგ კორპუსიდან გადმოხტა გასული წლის 17 დეკემბერს გარდაიცვალა. ახალგაზრდა იურისტთა ასოციაციის განცხადებით, არასრულწლოვანმა თვითმკვლელობა, საგამოძიებო ორგანოს თანამშრომლების მხრიდან ფსიქოლოგიური ძალადობის გამო სცადა.

პოლიციას გამოძიების დაწყების მოთხოვნით მწვანე სკოლამ მიმართა, რომლის ტერიტორიაზეც გვიან ღამით არასრულწლოვანმა სხვადასხვა წარწერები დატოვა. გავრცელებული ინფორმაციით, ეს 15 წლის ლუკა სირაძემ გააკეთა, რომელიც მწვანე სკოლის ყოფილი მოსწავლე იყო.

საიას ინფორმაციით, დაკითხვაზე ლუკა სირაძე ყოფილ თანაკლასელს დააპირისპირეს და მასზე ფსიქოლოგიურად იძალადეს, რის შემდეგაც ის მეცხრე სართულიდან გადმოხტა. რამდენიმე დღის განმავლობაში ის კომატოზურ მდგომარეობაში იყო.

შინაგან საქმეთა სამინისტრო ამტკიცებდა, რომ ბავშვი მშობელთან ერთად გამოკითხეს და ფსიქოლოგიური ძალადობას ადგილი არ ჰქონია. მათ გამოძიება თვითმკვლელობამდე მიყვანის მუხლით დაიწყეს. გამოძიებას სწორედ ის განყოფილება აწარმოებს, სადაც არასრულწლოვანზე, სავარაუდოდ, ფსიქოლოგიურად იძალადეს.

სახელმწიფო ინსპექტორის აპარატმა კი გამოძიება სისხლის სამართლის კოდექსის 335-ე მუხლით დაიწყო, რაც ჩვენების მიცემის იძულებას გულისხმობს. მოზარდის გარდაცვალების შემდეგ ამ საქმეზე გამომძიებელი მარიანა ჩოლოიანი დააკავეს და 2 სამართალდამცავს უფლებამოსილება დროებით შეუჩერეს. ჩოლოიანი ბრალს არ აღიარებს.

აღნიშნული საქმე თბილისის საქალაქო სასამართლოში უკვე იხილება.

ვინ არის მარიანა ჩოლოიანი

საქართველოს ახალგაზრდა იურისტთა ასოციაციის ინფორმაციით, მარიანა ჩოლოიანი ფიგურირებს 2011 წლის 26 მაისს ე.წ. ყინწვისის სპეცოპერაციის დროს დაკავებული ნიკოლოზ გოგუაძის საქმეში.

ორგანიზაციის განცხადებით, გოგუაძე 2011 წლის 26 მაისს, ე. წ. ყინწვისის სპეცოპერაციის დროს, ყინწვისის სამონასტრო კომპლექსის მიმდებარე ტერიტორიაზე დააკავეს. როგორც საიაში ამბობენ, დასჯისა და აღიარებითი ჩვენების მოპოვებისთვის გოგუაძეზე იყო როგორც ფიზიკური, ისე ფსიქოლოგიური ძალადობა.

ორგანიზაციის განცხადებით, ჩოლოიანმა სასამართლოში ძალადობა უარყო. ამავე დროს, კი 2019 წელს ადამიანის უფლებათა ევროპულმა სასამართლომ არასათანადო მოპყრობა დადგენილად მიიჩნია.