გამომძიებლები ვარაუდობენ, რომ ნაია რივერამ სიცოცხლის უკანასკნელი წუთები თავისი შვილის გადასარჩენად გამოიყენა.

Glee-ს მსახიობი გასულ ოთხშაბათს, 8 ივლისს გაუჩინარდა, როცა თავის 4 წლის შვილთან ერთად ტბა პირუში დაქირავებული ნავით გავიდა. რამდენიმე საათში მცირეწლოვანი ბავშვი ნავზე მარტო იპოვეს, რივერას კი ხუთი დღის განმავლობაში ეძებდნენ.

გუშინ, 13 ივლისს პოლიციამ სამხრეთ კალიფორნიაში მდებარე ტბა პირუში 33 წლის მსახიობის ცხედარი იპოვა. ამ ფაქტიდან რამდენიმე საათში პრესკონფერენცია გაიმართა, სადაც განაცხადეს, რომ მათი ვარაუდით, ნაირა რივერას გარდაცვალება ტრაგიკული შემთხვევა იყო.

"ნაიას შვილმა საუბრისას გვითხრა, რომ ნავით სეირნობის ერთ მომენტში ტბაში საცურაოდ ერთად ჩავიდნენ. სწორედ ამ დროს, როგორც ბავშვი აცხადებს, დედა დაეხმარა, რომ ნავზე ასულიყო, თავად კი წყალში ჩაიძირა", — განაცხადა გამომძიებელმა მედიასთან საუბრის დროს.

სამართალდამცავებმა პირველადი ვარაუდიც გამოთქვეს, თუ რა შეიძლება მომხდარიყო 8 ივლისის შუადღეს ტბა პირუზე:

"შესაძლოა, ნავი დინებას გაჰყვა, რადგან ღუზით არ იყო დამაგრებული და მან საკმარისი ძალა მოიკრიბა, რომ შვილი ნავზე დაებრუნებინა, თუმცა სამწუხაროდ, საკუთარი თავის გადარჩენა ვეღარ შეძლო".

ნაია რივერა თავის შვილთან ერთად, 2018 წელი.

ფოტო: Instagram

პრესკონფერენციაზე ასევე აღნიშნეს, რომ პირველადი დათვალიერებით სხეულს არ აღენიშნება "განზრახ მკვლელობის ან თვითმკვლელობის კვალი". ცხედარს აუტოფსია უტარდება და სპეციალისტები დაზუსტებულ ინფორმაციას მალე გაასაჯაროებენ.

ტბაზე გასვლიდან რამდენიმე საათში რივერას ოთხი წლის შვილი ნავზე მარტო მძინარე იპოვეს.

"ნაიას შვილი ტბის ჩრდილოეთ ნაწილში ნავზე მძინარე იპოვეს, როცა მეპატრონე თავის ნავს ეძებდა, რადგან დაქირავების შემდეგ ჩაბარების დრო დაგვიანდა. პატარა ბიჭს მაშველი ჟილეტი ეცვა და პირსახოცში იყო გახვეული", — განაცხადა პოლიციელმა გამოძიების დეტალებზე საუბრისას.

ფოტო: CHRIS DELMAS/Getty

აღსანიშნავია, რომ ეს პირველი შემთხვევა არ არის, როცა ტბა პირუში დამსვენებლების გასეირნება ტრაგიკულად დასრულდა: ბოლო წლებში ათეულობით ადამიანი დაიღუპა სწორედ იქ.

ამის გამო ნაია რივერას გაუჩინარების შემდეგ სპეციალური პეტიციაც კი შეიქმნა, რომლითაც მოქალაქეები ითხოვენ, რომ ამ ტბაში ცურვასთან დაკავშირებით უფრო მკაცრად დაიცვან უსაფრთხოების ზომები.

ნაია რივერას 8 ივლისიდან 13 ივლისამდე პოლიციელები აქტიურად ეძებდნენ, მათ შორის მყვინთავების, მაძებარი ძაღლების, შვეულმფრენებისა და სპეციალური წყალქვეშა ნავების დახმარებით.

ამ პროცესს ოჯახის წევრებთან ერთად მისი მეგობრები და კოლეგები, სერიალ Glee-ს მსახიობებიც ადევნებდნენ ადგილზე თვალს.

Glee-ს მსახიობები ტბა პირუზე.

ფოტო: AL SEIB/LOS ANGELES TIMES/GETTY