The New East Photo Prize აღმოსავლეთ ევროპის, ბალკანეთის, რუსეთისა და ცენტრალური აზიის მოქალაქეებისთვის თანამედროვე ფოტოგრაფიის კონკურსს აცხადებს. კონკურსში მონაწილეობა საქართველოდანაცაა შესაძლებელი.

კონკურსი ფოტოგრაფიის არტისტულ სრულყოფილებას ეძღვნება. მონაწილეებს ევალებათ, თავიანთი ფოტოპროექტით ასახონ ახალი აღმოსავლეთის სოციალური, კულტურული და ფიზიკური ლანდშაფტი.

უდიდესი მრავალფეროვნების მიუხედავად, აღმოსავლეთ ევროპისა და ყოფილი საბჭოთა კავშირის ქვეყნები ხშირად ძველმოდურადაა წარმოდგენილი, რაც ამ ქვეყნების მდიდარ კულტურასა და შემოქმედებითობას უგულებელყოფს.

კონკურსის მიზანი ფოტოგრაფიის მეშვეობით ახალი აღმოსავლეთის აღქმის გაფართოებაა. The New East Photo Prize აქამდე უკვე ორჯერ ჩატარდა და პრიზებით ახალი აღმოსავლეთის 25 ქვეყნის 1 700-ზე მეტი მონაწილე დასაჩუქრდა.

The New East Photo Prize არის Calvert 22 Foundation-ის პროექტი, რომელსაც მხარს უჭერს მისი ონლაინ გამოცემა The Calvert Journal, და პრიზებთან ერთად კონკურსის ყველა ფინალისტი მიიღებს იმის შესაძლებლობას, რომ საერთაშორისო დონეზე გაშუქდეს The Calvert Journal-ისა და სხვა მედიაპარტნიორების მეშვეობით.

კონკურსში მონაწილეობა

კონკურსში მონაწილეობის მისაღებად მსურველებმა სარეგისტრაციო ფორმა უნდა შეავსონ და წარადგინონ პროექტი, რომელიც ბოლო ორი წლის განმავლობაში ახალი აღმოსავლეთის ქვეყნებშია გაკეთებული.

პროექტში მოიაზრება ერთობა ფოტოებისა, რომლებიც გადაღებულია ახალ აღმოსავლეთში (ქვეყნების სრული სია იხილეთ ქვემოთ) და იკვლევს განსაზღვრულ თემასა თუ საკითხს. თემის შერჩევაში ფოტოგრაფს სრული თავისუფლება აქვს და კონკურსი ფოტოგრაფიის მრავალი სხვადასხვა სფეროს წარმომადგენელს მიესალმება, იქნება ეს პორტრეტი, პეიზაჟი, დოკუმენტური ფოტოგრაფია, თანამედროვე ხელოვნება თუ არქიტექტურა. თითოეული პროექტი უნდა შეიცავდეს არაუმეტეს 15 ფოტოს, რომლებიც ერთიანი სერიის სახით შეფასდება.

კონკურსში მონაწილეობის მისაღებად პროფესიონალური ფოტოგრაფობა არ არის აუცილებელი და ნამუშევრები შეფასდება შემოქმედებითი ფასეულობით და არა — ფოტოგრაფის სტატუსით.

მსურველი აუცილებლად უნდა იყოს 18 წლის ან მეტის და ჰქონდეს საქართველოს (ან ახალი აღმოსავლეთის რომელიმე სხვა ქვეყნის) მოქალაქეობა, თუნდაც ამჟამად საზღვარგარეთ ცხოვრობდეს.

თითოეულ განაცხადს თან უნდა ახლდეს პროექტის ფოტოგრაფიული მნიშვნელობის ახსნა, მაქსიმუმ 600 სიტყვა, და მოკლე ბიოგრაფიული მიმოხილვა, მაქსიმუმ 200 სიტყვა.

აპლიკაციები 2020 წლის 20 სექტემბრამდე მიიღება.

The New East Photo Prize-ში მონაწილეობა შეუძლიათ აღმოსავლეთ ევროპის, ბალკანეთის, რუსეთისა და ცენტრალური აზიის წარმომადგენლებს. ქვეყნების სრული სია ასეთია: აზერბაიჯანი, ალბანეთი, ბელარუსი, ბოსნია და ჰერცეგოვინა, ბულგარეთი, ესტონეთი, თურქმენეთი, კოსოვო, ლატვია, ლიეტუვა, მაკედონია, მოლდოვა, მონტენეგრო, პოლონეთი, რუმინეთი, რუსეთი, საქართველო, სერბეთი, სლოვაკეთი, სლოვენია, სომხეთი, ტაჯიკეთი, უზბეკეთი, უკრაინა, უნგრეთი, ყაზახეთი, ყირგიზეთი, ჩეხეთი, ხორვატია.

უფრო დაწვრილებითი ინფორმაციისთვის ეწვიეთ კონკურსის ვებგვერდს.

კონკურსის პრიზები

ფულადი პრიზი

The Calvert Journal-ისა და სხვა მედიაპარტნიორების მეშვეობით ნამუშევრების ონლაინ საერთაშორისო დონეზე გამოფენის შესაძლებლობის გარდა, New East Photo Prize-ის გამარჯვებული მიიღებს £1 000-მდე (დაახლოებით $1260-მდე) ფულად პრიზს ფოტოგრაფიული მოღვაწეობის შემდგომი განვითარების ხელშესაწყობად.

ვაუჩერი ფოტოგრაფიული აღჭურვილობისთვის

ახალბედა ფოტოგრაფების მხარდასაჭერად განკუთვნილი ამ პრიზით გამარჯვებულს მიეცემა £500-იანი (დაახლოებით $630-მდე) ვაუჩერი სასურველ მაღაზიაში დასახარჯად.

Mentorship Award

Mentorship Award-ის გამარჯვებულს Spazio Labo’ Photography სრულად დაუფინანსებს დავიდ მონტელეონესა და Spazio Labo-ს მიერ ორგანიზებულ კურსს ვიზუალური თხრობის შესახებ, რომელიც სპეციალურადაა შემუშავებული დამწყები ვიზუალური ამბის მთხრობელებისთვის. კურსი ჩატარდება 2021 წლის იანვარ-ივნისში და ის მოიცავს ინდივიდუალურ მენტორობას, ექვს ინტერაქციულ ჯგუფურ სემინარს და ოთხ პირისპირ შეხვედრას სახელგანთქმულ ლექტორებთან.

გამოფენა (დაუდასტურებელი)

კონკურსი საწყის გეგმებში შედიოდა ფინალისტების ფოტოგამოფენის გამართვა ევროპაში 2020 წლის შემოდგომაზე, თუმცა ბოლოდროინდელი პანდემიის მოვლენებიდან გამომდინარე, ჯერჯერობით უცნობია, რამდენად უსაფრთხო იქნება გამოფენის ჩატარება და დარჩება თუ არა ეს პრიზი ძალაში.

წინა გამარჯვებულები

ალნის სტაკლე — New East Photo Prize 2018-ის გამარჯვებული, რომელმაც £1 000-იანი ფულადი ჯილდო მიიღო. მისი პროექტი Heavy Waters ფოკუსირდებოდა ყირიმის სანაპიროს ქალაქებსა და გარეუბნებზე.

ელენა სუბაჩი — New East Photo Prize 2016-ის გამარჯვებული, რომელმაც კონკურსის პარტნიორი Bird in Flight-ისგან მიიღო £1 000. მისი პროექტი The Sacrifice ეძღვნება პროვინციულ უკრაინაში გაზრდის მის გამოცდილებას და გვაძლევს იმის იშვიათ და უჩვეულო შესაძლებლობას, ვიხილოთ, როგორია ამ ქალაქებში ცხოვრება დღეს.