ბაჩანა შენგელიამ გენერალურ პროკურატურას მის საქმეზე გამოძიების დაწყების მოთხოვნით მიმართა. ის ითხოვს, პროკურატურამ დაადგინოს, რატომ არ სრულდება სასამართლოს გადაწყვეტილება, რომლის მიხედვითაც მას სანოტარო სისტემასთან წვდომა უნდა აღუდგეს.

"გამოძიებამ უნდა დაადგინოს, ვისი ბრძანებით არ სრულდება სასამართლოს გადაწყვეტილება. შესაძლოა, ეს მინსიტრიც იყოს, არ მგონია მის გარეშე რამე ხდებოდეს", — განაცხადა შენგელიამ On.ge-სთან საუბრისას და განმარტა, რომ იუსტიციის სამინისტრო უკვე მე-13 დღეა არ ასრულებს სასამართლოს გადაწყვეტილებას.

29 ივნისს შენგელიამ გამოაქვეყნა იუსტიციის სამინისტროს გენერალური ინსპექციის წერილი, სადაც წერია, რომ ნოტარიუსად მუშაობა პოლიტიკური შეფასებების გამო შეუზღუდეს. დოკუმენტში აღნიშნულია, რომ შენგელიას ფეისბუქს ერთი თვის განმავლობაში ამოწმებდნენ, რის შემდეგაც დაადგინეს, რომ ბაჩანა ის "ახორციელებდა მიკერძოებული პოლიტიკური შეხედულების საჯაროდ გამომჟღავნებას და აკეთებდა პოლიტიკურ შეფასებებს".

იუსტიციის მინისტრმა ბაჩანა შენგელიასთვის სანოტარო საქმიანობის შეჩერების შესახებ ოპოზიციის კითხვებს პარლამენტში უპასუხა. თეა წულუკიანის თქმით, ნოტარიატის შესახებ კანონით, პოლიტიკურ საქმიანობაში ნოტარიუსის ჩარევა აკრძალულია. მან ოპოზიციას მოუწოდა, ნუ "აპოლიტიზებს" თემას და ნუ აფიქრებინებენ, რომ "ეს ადამიანი მთლად პოლიტიკურად ნეიტრალური არ არის".

პირველ ივლისს თბილისის საქალაქო სასამართლომ ბაჩანა შენგელიას განცხადება დააკმაყოფილ და იუსტიციის სამინისტროს სანოტარო საქმიანობის სისტემასთან წვდომის აღდგენა დაავალა.

თუმცა, სასამართლო განჩინების მიუხედავად, იუსტიციის სამინისტრომ მას სანოტარო საქმიანობის უფლება არ აღუდგინა. სასამართლოს გადაწყვეტილების სისრულეში მოსაყვანად, შენგელიამ აღსრულების ბიუროსაც მიმართა.