საქართველოს სახალხო დამცველი მიიჩნევს, რომ საზოგადოებრივი მაუწყებლის გადაცემა კაცების დროს პრომო ვიდეო გენდერული სტერეოტიპების გამყარებას უწყობს ხელს:

"რეკლამა გენდერულად მჩაგვრელ პრაქტიკას ამკვიდრებს და ხელს უწყობს უარყოფითი გენდერული სტერეოტიპების გამყარებას ქალების პროფესიული შესაძლებლობების და მათი განვითარების შესახებ."

გადაცემის პრომოში ნაჩვენებია ქალები, რომლებიც დასაქმებულნი არიან როგორც მკერავები, რომლის გვერდით ზედამხედველივით დგას ორი მამაკაცი:

"გავრცელებულ პრომო რგოლში, ქალებს მხოლოდ ფონის შექმნა ევალებათ, მაშინ როდესაც ორი მამაკაცი ცენტრალურ ფიგურად გვევლინება. ქალების დაკნინებულ მდგომარეობაში წარმოჩენით ხდება საზოგადოებაში კაცის ცენტრალური როლის ხაზგასმა."

სახალხო დამცველი საზოგადოებრივ მაუწყებელს ქცევის კოდექსს ახსენებს, რომლის მიხედვით, მაუწყებლის მიზანია დაიცვას მრავალფეროვნება და თანასწორობა, რაც გულისხმობს, მათ შორის, გენდერული დისკრიმინაციის წინააღმდეგ ბრძოლას.

ომბუდსმენი მოუწოდებს საზოგადოებრივ მაუწყებელს, გადაცემებისა და პრომო რგოლების დამზადებისას განსაკუთრებული ყურადღება დაუთმოს ადამიანის პატივის, ღირსებისა და თანასწორუფლებიანობის დაცვას.