ევროპული საქართველოს წევრი, ელენე ხოშტარია ამბობს, რომ გიორგი შაქარაშვილის საქმეს დამამძიმებელ გარეომებებში ჯგუფურად განზრახ მკვლელობის კვალიფიკაცია აქამდეც უნდა ჰქონოდა. მისი თქმით, აქამდე ყველამ იცოდა, რომ შაქარაშვილი ძალადობას შეეწირა.

"აქამდეც არ შეიძლებოდა, რომ ეს კვალიფიკაცია არ ყოფილიყო. წარმოუდგენელია, რომ ჩვენ ყველამ ვიცოდით აქამდეც, რომ ადამიანი იყო გარდაცვლილი. დეტალების გარკვევის მიუხედავად, ზოგადად ძალადობა კი არ იყო ეს, ეს იყო ფაქტი, რომ ადამიანი ამ ძალადობას შეეწირა. შესაბამისად, თავიდანვე კვალიფიკაცია იყო არასწორი და ამიტომც გაჩნდა გზადაგზა ძალიან ბევრი სერიოზული პრეტენზია", — განაცხადა დეპუტატმა.

როგორც ხოშტარია ამბობს, ექსპერტიზის დასკვნაზე კომენტარს ვერ გააკეთებს. თუმცა, მისი თქმით, ის, რომ ამ საქმეში ბევრი კითხვა ჟურნალისტების მეშვეობით გაჩნდა, ასე არ უნდა ხდებოდეს.

"ფაქტია, რომ არა ჟურნალისტების აქტიურობა, მთელი რიგი რაღაცები ჩვენ არ გვეცოდინება. ეს ისეთი საქმე არ არის, რომ ასე უნდა ხდებოდეს, არ შეიძლება, რომ ამ საკითხზე სახელმწიფო უპირისპირდებოდეს ჟურნალისტებს ან მიყვებოდეს ჟურნალისტების ქმედებას", — განაცხადა ხოშტარიამ.

გენერალურმა პროკურატურამ გიორგი შაქარაშვილის დაღუპვის საქმის კვალიფიკაცია დააზუსტა. 10 ივლისიდან ამ საქმეზე გამოძიება დამამძიმებელ გარემოებებში ჯგუფურად განხორციელებული განზრახ მკვლელობის მუხლით გაგრძელდება. დანაშაული გათვალისწინებულია საქართველოს სისხლის სამართლის კოდექსის 109-ე მუხლის მე-2 ნაწილის ე ქვეპუნქტით.

ეს გადაწყვეტილება პროკურატურამ სასამართლო-სამედიცინო ექსპერტიზის დასკვნისა და საქმეში არსებული სხვა მტკიცებულებების ერთობლივი ანალიზის საფუძველზე მიიღო. საქმეზე შინაგან საქმეთა სამინისტროში გრძელდება გამოძიება. მიმდინარეობს მოწმეთა გამოკითხვები და უკვე მოპოვებული ინფორმაციის ანალიზი.

"მოპოვებული მტკიცებულებების საფუძველზე, პროკურატურის მიერ მიღებული იქნება შესაბამისი სამართლებრივი გადაწყვეტილება, რის შესახებაც გიორგი შაქარაშვილის ოჯახს და საზოგადოებას პერიოდულად მიეწოდება დეტალური ინფორმაცია. საქართველოს პროკურატურა აღნიშნულ საქმეზე არსებული მაღალი საზოგადოებრივი ინტერესის გათვალისწინებით, მომავალშიც მიაწვდის საზოგადოებას დეტალურ ინფორმაციას, რის შესახებაც წინასწარ აუცილებლად გაიმართება კონსულტაცია გიორგი შაქარაშვილის ოჯახთან", — წერია პროკურატურის განცხადებაში.

საქართველოს პროკურატურის განცხადებით, შაქარაშვილს გარდაცვალებამდე მკვრივი-ბლაგვი საგნით მიყენებული დაზიანებები აქვს. უწყებამ ექსპერტიზის დასკვნა დღეს, 10 ივლისს გაასაჯაროვა. დასკვნაში წერია, რომ შაქარაშვილის სიკვდილის მიზეზია ასფიქსია წყალში დახრჩობით:

"გიორგი შაქარაშვილის ცხედარზე აღინიშნება სიკვდილის წინა ახლო პერიოდში მკვრივი-ბლაგვი საგნის მოქმედებით მიყენებული, სიცოცხლისდროინდელი დაზიანებები შუბლის/თავის, ორივე თვალბუდის, ზედა და ქვედა ტუჩის მიდამოებში, მარჯვენა იდაყვის სახსრისა და მარჯვენა წინამხრის მიდამოებში, აგრეთვე მუცლის, საზარდულის, ბოქვენის, წელისა და ორივე დუნდულოს მიდამოებში. ექსპერტიზის დასკვნის მიხედვით, აღნიშნული დაზიანებები, იზოლირებულად აღებული, ატარებენ სხეულის დაზიანებათა მსუბუქი ხარისხის ნიშნებს".