ისლანდიის მთავრობამ ევროკავშირის მიერ რეკომენდირებულ "ეპიდემიოლოგიურად უსაფრთხო" 15-ვე ქვეყანას, მათ შორის, საქართველოსაც უხსნის საზღვრებს. ამის შესახებ ინფორმაციას Schengenvisainfo News ავრცელებს.

15 ქვეყნიდან ჩასული მგზავრები მანამდე PCR ტესტირებისთვის უნდა დარეგისტრირდნენ, ან უნდა გადავიდნენ 14-დღიან კარანტინში. ისლანდია ახალ რეგულაციებს უახლოეს დღეებში გამოაქვეყნებს. მანამდე კი ძალაშია 15 ივნისს ამოქმედებული რეგულაციები, როცა მხოლოდ ევროკავშირის წევრ ქვეყნებს გაუხსნეს საზღვრები.

30 ივნისს ევროკავშირის საბჭომ გამოაქვეყნა იმ 15 "უსაფრთხო" ქვეყნის სია, რომელთანაც პირველი ივლისიდან მოგზაურობას აახლებს. მათ შორის მოხვდა საქართველოც.

მოგზაურთა დასაშვებად, მესამე ქვეყნებისთვის განმსაზღვრელია ეპიდემიოლოგიური მდგომარეობა და უსაფრთხოების ზომები, როგორიცაა, ფიზიკური დისტანცია და ეკონომიკური და სოციალური მოსაზრებები. საბჭოს განცხადებით, ეპიდემიოლოგიური სიტუაციის თვალსაზრისით, მესამე ქვეყნები შემდეგ კრიტერიუმებს უნდა აკმაყოფილებდნენ:

  • კორონავირუსის ახალი შემთხვევები 14 დღის განმავლობაში 100 000 ადამიანზე ევროპის საშუალო მონაცემებთან ახლოს ან ქვემოთ (2020 წლის 15 ივნისის მდგომარეობით);
  • ახალი შემთხვევების სტაბილური ან კლებადი ტენდენცია აღნიშნულ პერიოდში, წინა 14 დღესთან შედარებით;
  • ზოგადი პასუხი COVID-19-თან, სადაც მხედველობაში მიიღება ტესტირება, დაკვირვება, კონტაქტების მოძიება, მკურნალობა და ინფორმაციის სანდოობა. ასევე, საჭიროების შემთხვევაში ჯანდაცვის საერთაშორისო რეგულირების საშუალო ქულა.

ჩეხეთი ევროკავშირის საბჭოს მიერ შეთავაზებული ქვეყნებიდან მხოლოდ რვას გაუხსნის საზღვარს. მათ სიაში ვერ მოხვდა საქართველო. საქართველოსთან ერთად შეხეთმა სიიდან ამოიღო ალჟირი, მაროკო, რუანდა, ტუნისი, ურუგვაი და ჩინეთი.