თურქეთში დასაქმებული მოვაჭრეები საზღვრის გახსნის მოთხოვნით სარფის საბაჟოსთან აქციას მართავენ. მედიასთან საუბრისას აქციის მონაწილეები ამბობენ, რომ უკვე მეოთხე თვეა შემოსავალის გარეშე დარჩნენ. მათ გზის სავალი ნაწილი გადაკეტეს და თურქეთიდან შემოსულ სატვირთო მანქანის მძღოლებს გასვლის საშუალებას არ აძლევენ.

"მასხრად გვიგდებენ? ვითხოვთ ერთი მთავრობის წარმომადგენელი მოვიდეს და მოგვაქციოს ყურდღება, პასუხი გაგვცეს, გაგვწირა ამ მთავრობამ ჩვენ?! გაწირულები ვართ?! გახსნიან გზას თუ არ გახსნიან, ჩვენ თავებს და ოჯახებს მაინც რომ მივხედოთ", — ამბობს რადიო თავისუფლებასთან აქციის ერთ-ერთი მონაწილე.

მოვაჭრე ამბობს, რომ 15 წელია თურქეთში მუშაობდა და დღეს უკიდურესად გაჭირვებულ მდგომარეობაშია. მოვაჭრეები მედიასთან აღნიშნავენ, რომ მათ არც სახელმწიფოს მხრიდან აუღიათ რაიმე დახმარება.

აქციაზე მობილიზებულია პოლიციაც, რომელიც შეკრებილებს მოუწოდებს, რომ გზის სავალი ნაწილი დატოვონ. ამ დროისთვის საქართველო-თურქეთის საზღვარი მხოლოდ სატვირთო მიმოსვლისთვისაა გახსნილი.