ბათუმის საკრებულოს წევრი, თემურ კახიძე ქართული ოცნებიდან ევროპულ საქართველოში გადავიდა. ამის შესახებ ევროპული საქართველოს ერთ-ერთმა ლიდერმა, გიგი უგულავამ ბათუმში დღეს გამართულ ბრიფინგზე განაცხადა. მისი თქმით, მას შემდეგ, რაც ქართულ ოცნებაში კახიძის გადაწყვეტილების შესახებ გაიგეს, ის პარტიიდან დაჩქარებული წესით გარიცხეს.

"მას შემდეგ რაც ცნობილი გახდა, რომ ბატონმა თემურმა მიიღო ეს გადაწყვეტილება, მთელი ქართული ოცნება აწრიალდა. მთელი ღამის განმავლობაში სხვადასხვა სტრუქტურებთან ერთად წრიალებდნენ, მაგრამ ვერაფერს, რომ ვერ მიაღწიეს და რომ ნახეს, რომ თემურის გადაწყვეტილება იყო მყარი და ეფუძნებოდა პრინციპებს, დილით მოასწრეს და ძირდამპალი ხელისუფლების კლასიკურ ჟანრში იმოქმედეს და ბატონი თემური დილაადრიან გარიცხეს ფრაქციიდან", — განაცხადა უგულავამ.

დღეს დილით ქართულმა ოცნებამ თემურ კახიძის გარიცხვის შესახებ განცხადება გაავრცელა. როგორც პარტიაში განმარტავენ, ამის მიზეზი "მმართველი გუნდის პრინციპებთან მისი საქმიანობის შეუსაბამობა და მერკანტილურ პოლიტიკურ გარიგებებში მონაწილეობა" იყო.