ფონდი ქართუ იპოდრომის შესყიდვასთან დაკავშირებით გავრცელებულ ინფორმაციას განცხადებით ეხმაურება და აცხადებს, რომ რამდენიმე მედიასაშუალების მხრიდან "ხელოვნურად წარმოქმნილი აჟიოტაჟის" მიზანი ფონდის და მისი დამფუძნებლის მიმართ არაჯანსაღი განწყობების შექმნაა.

"ხაზგასმით გვინდა განვაცხადოთ, რომ ვერანაირი აჟიოტაჟი და პოლიტიკური სპეკულაციები ვერ შეუშლის ხელს ქართული სახელმწიფოსა და ხალხის მხარდასაჭერად ფონდის მიერ სამომავლოდ დაგეგმილ და მიმდინარე საქველმოქმედო პროექტების განხორციელებას", — წერია განცხადებაში.

მათი განცხადებით, ფონდის საქმიანობა "აბსოლუტურად გამჭვირვალეა" და თუ ვინმეს დამატებითი კითხვები აქვს თანხების წარმომავლობასა და განკარგვასთან დაკავშირებით, შეუძლიათ სასამართლოს მიმართონ.

ევროპული საქართველოს წევრმა, ირაკლი აბესაძემ გაავრცელა ინფორმაცია, რომ ბიძინა ივანიშვილის საკუთრებაში მყოფმა შპს ინვესტ კაპიტალმა არსებული იპოდრომი გაყიდა და ისევ ბიძინა ივანიშვილის ფონდმა ქართუმ შეისყიდა.

"იპოდრომი გაიყიდა. გამყიდველი — ბიძინა ივანიშვილი (შპს ინვესტ კაპიტალი), მყიდველი — ბიძინა ივანიშვილი (ფონდი ქართუ), ფასი — 60 მილიონი... იპოდრომის აღორძინება უნდა და ძველი კომპანია ვერ იზამდა? ფული გაათეთრა? საარჩევნოდ ფულის მობილიზება გააკეთა? ფონდ ქართუს მიწის საყიდლად ფული თვითონ მისცა, ოფშორულმა კომპანიამ, თუ სხვამ? მოკლედ კითხვა ბევრია...", — წერს აბესაძე.

ეკონომიკის მინისტრი, ნათია თურნავა ბიძინა ივანიშვილის მიერ შესაძლო ფულის გათეთრებასთან დაკავშირებით კითხვას "ბნელ ოთახში კატის ძებნას" ადარებს. მისი შეფასებით, მსგავსი კითხვები ამორალურია.