ბავშვების აღზრდა და მათ განვითარებაზე ზრუნვა, ალბათ, ერთ-ერთი ყველაზე მნიშვნელოვანი სამუშაოა მსოფლიოში, რომლის შესრულებაც მშობლებს არსებული სამსახურის პარალელურად უწევთ.

პანდემიამ დასაქმებული მშობლები დააფიქრა, ერთ მხარეს საქმეები და მეორე მხარეს კი — შვილები, რომელთაც ყურადღება, გართობა და განვითარება სჭირდებათ. ბაღების გარეშე კი პატარებს მხოლოდ ეკრანები რჩებათ თავის შესაქცევად. სწორედ ამ მიზეზის გამო, რათა თანამშრომელთა ბავშვებისთვის გასართობი აქტივობები შეეთავაზებინა, საქართველოს ბანკმა ახალი ინიციატივის განხორციელება დაიწყო, რაც ბანკის თანამშრომლების შვილებისთვის ონლაინ ბაღის შეეთავაზებას გულისხმობს.

ბაღი ონლაინ, შიდა საკომუნიკაციო პლატფორმა Workplace-ზე იფუნქციონირებს, რომელიც საქართველოს ბანკმა 2019 წელს გამჭვირვალობის, ღიაობის, ნაკლები ბიუროკრატისა და მეტი ეფექტურობის მიზნით დანერგა.

როგორ იმუშავებს ონლაინ ბაღი?

იდეის გაჩენის შემდეგ ბანკმა პირველ რიგში, საქმიანი პარტნიორის მოძებნა დაიწყო. ამ პროექტისთვის ბაღი ფელიქსი შეარჩიეს, რომელიც 15-მდე კვალიფიციურ აღმზრდელს აერთიანებს.

ფელიქსის მშობლებთან ურთიერთობის სამსახურის უფროსი, ნანიკო გვიყვება, რომ პანდემიამ ფელიქსის გუნდს ახალი გამოწვევები გაუჩინა, თუმცა ბაღი ონლაინ ფორმატზე მალევე გადაეწყო, რაშიც მშობლებიც აქტიურად იყვნენ ჩართულები.

"ჩვენ უმეტესად თამაშით ვასწავლით; ჩვენი აღსაზრდელები 3-დან 6 წლამდე ბავშვები არიან და ყველა აქტივობა, რაც მათთვის არის გაწერილი, თამაშის ელემენტს მოიცავს. ონლაინ ფორმატი ბავშვებისთვისაც ახალი იყო, მაგრამ მაქსიმალურად ვეცადეთ, რომ არ დაგვეკარგა მათთან კავშირი და არ ჩამორჩენილიყვნენ გარკვეულ აქტივობებში, რადგან ამ ასაკში მუდმივი კომუნიკაცია და თამაში უმნიშვნელოვანესია".

სალომე ყუფარაძე საქართველოს ბანკის თანამშრომელია და ბაღის ასაკის ბავშვი ჰყავს. სხვა მშობლებივით, მასაც უნდა, რომ მისი შვილი მეტად იყოს ჩართული საინტერესო აქტივობებში:

"მოხარული ვარ, რომ ბანკმა თანამშრომლებისთვის ასეთი ინიციატივის განხორციელება დაიწყო. მაშინ, როდესაც პანდემიის გამო დისტანციურ რეჟიმში ვმუშაობთ და სახლში ყოფნის მიუხედავად ვერ ვატარებთ ბავშვებთან საკმარის დროს, ონლაინ ბაღი დაგვეხმარება ჩვენი შვილების განვითარებაში, მათთვის საინტერესო აქტივოებში ჩართვაში. პროგრამას გადავხედე და საკმაოდ საინტერესო, დატვირთული და ბავშვის განვითარებაზე ორიენტირებულია. სასიამოვნოა, როცა დამსაქმებელი ზრუნავს თანამშრომლის კომფორტზე და პანდემიის პირობებში არსებული გამოწვევების გადაწყვეტას გთავაზობს", — ამბობს სალომე.

ფელიქსი ინდივიდზე ორიენტირებული მიდგომით ასწავლის, რაც გულისხმობს ბავშვის შესაძლებლობებისა და ინტერესების გათვალისწინებას სწავლების პროცესში. ბაღი ბავშვებს საგანმანათლებლო, გასართობ და გამაჯანსაღებელ აქტივობებს ონლაინ რეჟიმში, ყოველ სამუშაო დღეს შესთავაზებს.

• 3-დან 6 წლამდე ბავშვები ყოველდღე, დღეში 1,5 საათით ჩაერთვებიან ზუმში;
• ჩართვები დატვირთული იქნება როგორც ფიზიკური, ასევე სახალისო-საგანმანათლებლო აქტივობებით;
• ცხრილსა და ზუმის ბმულებს მშობლები წინასწარ მიიღებენ, სპეციალურად ამ ონლაინ ჩართვებისთვის შექმნილ ჯგუფში.

ასე რომ, ონლაინ ბაღის მეშვეობით მშობლებს შეუძლიათ მშვიდად იყვნენ — სანამ ისინი მუშაობენ, მათ პატარებზე პროფესიონალი აღმზრდელები იზრუნებენ.