ბრალდებული გიორგი რურუა პარლამენტის მიერ ახალი საარჩევნო სისტემის დამტკიცებას ეხმაურება და წერს, რომ ბრძოლას ყოველთვის აქვს აზრი.

"გილოცავთ საკონსტიტუციო ცვლილებების მიღებას, ბრძოლას ყოველთვის აქვს აზრი", — წერს რურუა Facebook-ზე.

დღეს პარლამენტმა ახალი საარჩევნო სისტემა დაამტკიცა, რომლის მიხედვით, მომავალ არჩევნებში 120 დეპუტატი საარჩევნო სიით მოხვდება, 30 კი მაჟორიტარი იქნება. ოპოზიცია კენჭისყრას არ ესწრებოდა, მათი მთავარი მოთხოვნა სწორედ რურუას გათავისუფლება იყო.

8 მარტის შეთანხმება და საარჩევნო სისტემა

8 მარტის შეთანხმება საარჩევნო სისტემასთან დაკავშირებით საკონსტიტუციო ცვლილებებზე კონსენსუსს და მართმსაჯულების სისტემას ეხებოდა. ცვლილებების თანახმად, არსებული საარჩევნო სისტემა უნდა შეიცვალოს და მომავალი მოწვევის პარლამენტში პარტიული სიით 77-ის ნაცვლად 120 დეპუტატს აირჩევენ, მაჟორიტარი კი 73-ის ნაცვლად მხოლოდ 30 იქნება.

ოპოზიცია აცხადებს, რომ შეთანხმების ნაწილი იყო პოლიტპატიმრების გათავისუფლება, რასაც მმართველი გუნდი უარყოფს. 2 პოლიტიკოსი, გიგი უგულავა და ირაკლი ოქრუაშვილი პრეზიდენტმა შეიწყალა, მაგრამ პატიმრობაში რჩება მთავარი არხის მეწილე გიორგი რურუა, რის გამოც ოპოზიცია კენჭისყრაში არ მონაწილეობს.

კონსტიტუციაში ცვლილებები პარლამენტმა უკვე დაამტკიცა. ნაციონალურმა მოძრაობამ არც ერთ კენჭისყრაში არ მიიღო მონაწილეობა, რის მიზეზადაც რურუას პატიმრობა დაასახელა. პირველ მოსმენაში პროექტს მხარი დაუჭირა ევროპულმა საქართველომ, თუმცა რურუას მიზეზით მესამე მოსმენაზე არ მივიდა.