უმრავლესობის წევრის, გუგული მაღრაძის აზრით, ქართული ოცნების ხელისუფლება ყველაზე ჰუმანური ხელისუფლებაა, რაც კი საქართველოს ჰყოლია. ამის შესახებ მან სახალხო დამცველის ანგარიშის მოსმენისას განაცხადა.

მაღრაძის თქმით, პრობლემები ქართული ოცნების მმართველობის დროსაც არის, თუმცა სახალხო დამცველი ხელისუფლებას "გვერდში უნდა ამოუდგეს" და ამ პრობლემების აღმოფხვრაში დაეხმაროს.

"მე საკმაოდ დიდი გამოცდილება მაქვს ქვეყანაში რა ხდებოდა. იმიტომ, რომ კიდეც მეშინია ხანდახან რომ გავხედავ, 90-იანი წლების მერე ვუყურებ რა ხდება ქვეყანაში. გინდაც ასე ჩამოართვით, გინდათ ისე, შემიძლია ხაზგასმით ვთქვა, რომ ქართული ოცნების ხელისუფლება არის ყველაზე ჰუმანური ხელისუფლება, რაც ჰყოლია საქართველოს", — განაცხადა მაღრაძემ.

დღეს პარლამენტის პლენარულ სხდომაზე სახალხო დამცველის ანგარიშს უსმენენ, სადაც ქვეყანაში ადამიანის უფლებების მდგომარეობაა შეფასებული და არსებულ პრობლემებზეა საუბარი.