განახლება: ეკა ბესელიამ On.ge-სთან განმარტა, რომ 20 ივნისის მოვლენების დროს დელეგაციის წევრი არ ყოფილა და მასში ყოფნის შესახებ შემთხვევით გაიგო.

გავრილოვის ღამიდან ერთი წლის თავზე ეკა ბესელიამ მართლმადიდებლობის საპარლამენტთაშორისო ასამბლეის დელეგაციის დატოვება გადაწყვიტა. ბესელიამ საგარეო ურთიერთობათა კომიტეტის თავმჯდომარესა და ბიუროს შესაბამისი წერილით 22 ივნისს მიმართა.

როგორც საქართველოს პარლამენტის ვებგვერდზეა აღნიშნული, მართლმადიდებლობის საპარლამენტთაშორისო ასამბლეის დელეგაციის ძირითად შემადგენლობაში ქართული ოცნების დეპუტატი, დიმიტრი ხუნდაძე და პატრიოტთა ალიანსის წევრი, ადა მარშანია არიან.

დამოუკიდებელი დეპუტატი ეკა ბესელია კი მმართველი გუნდის წარმომადგენელთან, ენძელა მაჭავარიანთან ერთად სათადარიგო შემადგენლობაშია.

როგორც ეკა ბესელიამ On.ge-ს განუმარტა, შარშან, 20 ივნისის დროს ის დელეგაციის წევრი არ ყოფილა და მხოლოდ PACE-ს სამეურვეო საბჭოს დელეგაციის წევრი იყო. როგორც ბესელია განმარტავს, მართლმადიდებლობის საპარლამენტთაშორისო ასამბლეის დელეგაციის წევრობის შესახებ მან შემთხვევით გაიგო.

"როცა დასჯის მიზნით ყველა დელეგაციიდან გამომიყვანეს და დამატოვებინეს ევროსაბჭოს საპარლამენტო ასამბლეა, ამ დელეგაციაში გაჩნდა ღია ადგილი და მანდ მიმაწერეს, რომელიც შემთხვევით აღმოვაჩინე და ვუთხარი, რომ არ მქონდა სურვილი ამ დელეგაციაში ყოფნის და მეგონა, რომ უკვე გამოსული ვიყავი. ახლახან ისევ აღმოჩნდა, რომ ვწერივარ როგორც ალტერნატიული წევრი. ახლა ისევ გავაგზავნე მოთხოვნა, გამომიყვანონ ამ დელეგაციიდან, რადგან ამის სურვილი არ მაქვს", — აღნიშნა ბესელიამ.

ბიურომ ბესელიას მიმართვა დღეს, 23 ივნისს განიხილა და ცნობად მიიღო.