როგორც ჩანს, ფრანგმა რეჟისორმა ფრანსუა ოზონმა გადაწყვიტა, რომ ლუკა გუადანინოს გახმაურებული ფილმის Call Me by Your Name ატმოსფეროთი მოხიბლული მაყურებლებისთვის ახალი კინოსურათი შეექმნა, რომელიც ნოსტალგიური სასიყვარულო ისტორიით მიიზიდავდა ყველას.

Summer of 85-ის მსოფლიო პრემიერა წლევანდელ კანის კინოფესტივალზე იყო დაგეგმილი, თუმცა, როგორც უკვე ვიცით, პანდემიის გამო ის აღარ გაიმართება. ფრანსუა ოზონთან ერთად ფესტივალის წლევანდელ პროგრამაში მოხვდა უეს ანდერსონის The French Dispatch, სტივ მაკქუინის Lovers Rock და ნაომი კავასეს ASA GA KURU.

ფრანსუა ოზონის ახალი ნამუშევრის პირველი ტრეილერი რამდენიმე დღის წინ გავრცელდა:

ფილმის სცენარი ბრიტანელი მწერლის ეიდენ ჩემბერსის რომანის მიხედვით შეიქმნა და 1980-იანი წლების ერთ ზაფხულს განვითარებული ორი თინეიჯერი ბიჭის მეგობრობისა და სიყვარულის შესახებ მოგვითხრობს.

როგორც ტრეილერში ვხედავთ, მოზარდების სასიყვარულო თავგადასავალი 80-იანი წლების ესთეტიკით გაცოცხლებულ რომანტიკულ ისტორიასთან ერთად ამავდროულად საოცრად დაძაბულ და დრამატულ ელემენტებს შეიცავს.

სამწუხაროდ, ჯერჯერობით პრემიერის ზუსტი თარიღი ცნობილი არ არის, თუმცა მის ხილვას მაყურებელი, დიდი ალბათობით, წლის ბოლომდე შეძლებს.