პრემიერმინისტრის, გიორგი გახარიას განცხადებით, ინფიცირების 4 ახალი შემთხვევა, რომლის წყარო დაუდგენელია, დიდი რისკის შემცველია. ამის შესახებ მან მთავრობის სხდომის დაწყების წინ განაცხადა.

"ეს არის ფაქტობრივად ოთხი ახალი კლასტერი, რომელზეც არაფერი ვიცით, საიდან, როდის ან სად მოხდა ეს ინფიცირება, რაც, რა თქმა უნდა, საგანგაშოა", — განაცხადა გახარიამ.

მან კიდევ ერთხელ გაიმეორა, რომ არავის უნდა ჰქონდეს იმის ილუზია, რომ კორონავირუსი დამარცხებულია.

"ყველას ძალიან კარგად უნდა გვესმოდეს, არც ერთ შემთხვევაში არ უნდა გადავდგათ ისეთი ნაბიჯები და უნდა ვიყოთ უკიდურესად გონიერები და ფრთხილები, რომ ის მიღწევა, რომელიც ჩვენ გაგვაჩნია არ დავკარგოთ და ამის ბევრი მაგალითია დღეს მსოფლიოში, როგორ ხდება მეორედ ეპიდემიოლოგიური აფეთქება სხვადასხვა ქვეყანაში. ამიტომ მე მინდა კიდევ ერთხელ თითოეულ უწყებას, თითოეულ ჩვენს მოქალაქეს მოვუწოდო უკიდურესი სიფრთხილისკენ და უკიდურესი გონიერებისკენ, ეს არის უკიდურესად მნიშვნელოვანი", — განაცხადა გახარიამ.

ბოლო 24 საათში კორონავირუსის 6 ახალი შემთხვევა გამოვლინდა, ხოლო 4 ადამიანი გამოჯანმრთელდა. მათგან 1 საკარანტინო სივრციდანაა, ხოლო 1 სამედიცინო პერსონალია. 4-ის წყარო უცნობია.

სულ შემთხვევები 828-მდე გაიზარდა, გამოჯანმრთელებულების რიცხვი 694 გახდა. გარდაცვლილია 13 ადამიანი. კარანტინის რეჟიმში 3 230 ადამიანი რჩება, ხოლო სტაციონარში მეთვალყურეობის ქვეშ — 285.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: