ექსპრემიერი გიორგი კვირიკაშვილი აცხადებს, რომ მთავრობის მეთაურობის დროს, მას "საკმაოდ დიდი თავისუფლება" ჰქონდა ივანიშვილისგან მიცემული, მაგრამ მხოლოდ "რაღაც პერიოდი". მისი თქმით, ამ პერიოდის გასვლის შემდეგ, ივანიშვილი ჩაერია.

"მე როცა ვიყავი პრემიერი, საკმაოდ დიდი ხარისხის თავისუფლება მქონდა მისგან მოცემული, რაღაც პერიოდში. მერე, რაღაც პერიოდში, მას აღარ მოეწონა რაღაცეები, როგორც ყველამ იცის ეს და ის ჩაერია ძალიან აქტიურად და დაბრუნდა პოლიტიკაში.

ძალიან ცდილობენ გააფორმონ, რომ მანამდე დაიქცა ქვეყანა და მერე გამოსწორდა ყველაფერი, მაგრამ თუ კარგად დააკვირდებიან ეს ადამიანები, მთლად ესე არ უნდა იყოს", — განაცხადა მან TV პირველთან სატელეფონო ინტერვიუში.

გიორგი კვირიკაშვილი ქართული ოცნების პრემიერმინისტრი იყო 2015 წლის 30 დეკემბრიდან 2018 წლის 13 ივნისის ჩათვლით. კვირიკაშვილი პრემიერ-მინისტრის თანამდებობიდან მალევე მას შემდეგ გადადგა, რაც ბიძინა ივანიშვილი პოლიტიკაში ოფიციალურად დაბრუნდა და პარტიის თავმჯდომარედ დაინიშნა.

მისი წასვლის ერთ-ერთ მთავარ მიზეზად მმართველი გუნდი მოსახლეობაში ჭარბვალიანობასა და ეკონომიკურ რეფორმების არაეფექტურობას ასახელებდა. თავად კვირიკაშვილმა კი თანამდებობის დატოვებისას ხმამაღლა განაცხადა გუნდში არსებულ დაპირისპირებასა და შეუთანხმებლობაზე. იქამდე კი თავისი გადადგომის შესახებ გავრცელებული ცნობები რამდენჯერმე უარყო.