თბილისის მერმა, კახა კალაძემ აქტივისტს, რომელმაც მერს მისი და ყოფილი პრეზიდენტის, მიხეილ სააკაშვილის ფოტოთი მაისური აჩუქა, ზედა უკან ხელმოწერით დაუბრუნა.

"მე მაისური საჩუქრად ბატონ მერს მოვუტანე მერიაში, შევედი, განცხადების წერის დროს და მაისური მიიღო მომსახურე პერსონალმა, ეს ჩემი საჩუქარი აუტანეს, დიდი სისწრაფით და იგივე ადამიანმა ჩამომიტანა ჩვენი ტროლი მერის, ხულიგანი და უზრდელი მერის პირადი ხელმოწერით დამიბრუნეს ეს მაისური", — თქვა კახა კვეკვესკირმა.

აქტივისტებმა დღეს მერის წინააღმდეგ სარჩელი პროკურატურაში შეიტანეს. საქმე ეხება ვარკეთილში, ერთ-ერთი სკვერის დროს მომხდარ დაპირისპირებას, როცა კახა კვეკვერსკის მაიკა შემოეხა. თბილისის მერმა მედიასთან საუბრისას აღნიშნა, რომ სავარაუდოდ, აქტივისტმა მაისური თავად შემოიხია. მერმა თქვა, რომ მას და მთავარ არხს ახალ ზედას საჩუქრად გაუგზავნიდა.

კალაძემ მედიასთან საუბრისას კიდევ ერთხელ უარყო გუშინ, 5 ივნისის ვარკეთილში მას და აქტივისტებს შორის რაიმე ტიპის ძალადობა. მისი თქმით, თუ შინაგან საქმეთა სამინისტროს საჭიროდ ჩათვლის გამოძიება უნდა დაიწყოს, თუმცა ადგილზე რამდენიმე ადამიანი მხოლოდ პროვოკაციის მოწყობას ცდილობდა. კალაძემ აღნიშნა, რომ აქტივისტებს სურდათ არეულობა შეეტანათ და სკვერის გახსნის ღონისძიება ჩაეშალათ, რაც არ გამოუვიდათ.

ვარკეთილში კახა კალაძესა და აქტივისტებს შორის დაპირისპირება მოხდა. მერი ვარკეთილში სკვერის გახსნაზე იყო მისული. ადგილზე ლაშა ჩხარტიშვილი და რამდენიმე აქტივისტი მივიდა.

მთავარი არხის მიერ გავრცელებულ კადრებში ჩანს, რომ თავდაპირველად აქტივისტმა მერს პროექტებთან დაკავშირებით რამდენიმე კითხვა დაუსვა, დაპირისპირება კი მას შემდეგ მოხდა, რაც ადგილიდან აქტივისტების განრიდება სცადეს.

როგორც ადგილზე ერთ-ერთი პირი ყვება, დაპირისპირების დროს მას ხელი ჰკრეს და მაისური დაუხიეს.

თბილისის მერიის პრესსამსახურში On.ge-ს განუცხადეს, რომ ფიზიკურ და სიტყვიერ დაპირისპირებას ადგილი არ ჰქონია. დაპირისპირების შემდეგ კახა კალაძემ ჟურნალისტებს უთხრა, რომ ნაციონალური მოძრაობის წევრებმა პროვოკაცია სცადეს.