ჯანდაცვის კომიტეტის თავმჯდომარის, დიმიტრი ხუნდაძის თქმით, მინისტრ ეკატერინე ტიკარაძის პარლამენტში მისვლის ვალდებულება რეგლამენტის მიხედვით ჰქონდა. დამოუკიდებელი დეპუტატის, ლევან კობერიძის მხრიდან დაბარების შემდეგ მინისტრმა საკითხზე მსჯელობის თვის ბოლომდე გადადება ითხოვა. კომიტეტის თავმჯდომარის თქმით, მინისტრის წერილი აძლევს იმის საფუძველს, რომ ის მივა სხდომაზე:

"თუმცა მე ვფიქრობ რეგლამენტი ითხოვდა, რომ ის ყოფილიყო აქ. [...] იყო მოთხოვნა დამოუკიდებელი დეპუტატების მხრიდან და პასუხად მოვიდა წერილი სადაც მინისტრი ითხოვს რომ თვის ბოლო კვირამდე გადაიდოს ეს საკითხები. [...] ასევე, გულწრფელად მინდა გითხრათ, მიუხედავად იმისა, რომ ჯანდაცვის მინისტრთან დაკავშირებით არის აზრთა სხვადასხვაობა, მეც მაქვს განსხვავებული აზრი იმ საკითხებთან დაკავშირებით, რაზეც არის ხოლმე საუბარი, მაგრამ კოვიდთან დაკავშირებით მინისტრმა თავი კარგად გაართვა".

დამოუკიდებელი დეპუტატის, ლევან კობერიძის თქმით, ეკატერინე ტიკარაძემ თავისი კოიმიტეტის სხდომაზე თავისი არმისვლით რეგლამენტის შესახებ კანონი დაარღვია. გარდა ამისა, ამის შესახებ კომიტეტს მან მხოლოდ ერთი დღით ადრე შეატყობინა, როცა რეგლამენტით სულ მცირე ერთი კვირის წინ უნდა შეეტყობინებინა.

"ვიღაცას შეიძლება, რეგლამენტი შინაგანაწესი ჰგონია, მაგრამ ეს არის კანონი. ჩვენ გვყავს მინისტრი, არაერთი სხვათა შორის, რომელიც კანონს არღვევს და ქალბატონი ეკატერინე არის ლიდერი, რადგან მესამედ არღვევს კანონს", — განაცხადა კობერიძემ.

კობერიძე ამბობს, რომ მინისტრობის განმავლობაში ტიკარაძე პროფილურ კომიტეტზე არც ერთხელ არ ყოფილა. მისივე განმარტებით, მინისტრები კანონს არღვევენ მაშინ, როცა მოსახლეობისგან კანონების დაცვას მოითხოვენ.