დაავადებათა კონტროლის ცენტრის ხელმძღვანელი, ამირან გამყრელიძე აცხადებს, რომ შემოდგომაზე ქვეყნის მასშტაბით სეროპრევალენტობის კვლევის ჩატარება იგეგმება. მისივე თქმით, მანამდე, ისინი მსგავსი კვლევის ჩატარებას ტურისტულ ობიექტებში აპირებენ.

რაც შეეხება ბოლნისსა და თელავში ჩატარებულ სეროპრევალენტულ კვლევას, გამყრელიძე ამბობს, რომ იქ შემთხვევითი პრინციპით 150-150 მოზრდილი ადამიანი შეარჩიეს და ანტისხეულებსა და ანტიგენებზე სწრაფ ტესტებს ატარებდნენ. აქედან დადებითი პასუხი ბოლნისში ერთ ადამიანს დაუფიქსირდა, ხოლო თელავში არავის.

მისივე თქმით, შემოდგომაზე ქვეყნის მასშტაბით კლასიკური სეროპრევალენტური კვლევა ჩატარდება, სადაც უკვე რამდენიმე ათასი ადამიანი იქნება შერჩეული და სწრაფ ტესტებს აღარ გამოიყენებენ.

"ამას სჭირდება სერიოზული მომზადება. მანამდე იქნება ასეთი ოპერაციული სეროპრევალენტობის კვლევები რამდენიმე მუნიციპალიტეტებსა და დასახლებულ ადგილებში. კლასიკური [კვლევა] მთელი ქვეყნის მასშტაბით ჩატარდება არა უკვე სწრაფი არამედ სეროლოგიური მეთოდით, რომელიც დაფუძნებულია იმუნოფერმენტულ ანალიზზე ე.წ. ელაიზაზე, რომელიც იძლევა უფრო ზუსტ მონაცემებს უმუნოგლობულინ-G და უმუნოგლობულინ-M ანტისხეულების გავრცელებისა ქვეყანაში. ერთი მიუთითებს მწვავე რეაქციაზე, მეორე მიუთითებ გადატანილ დაავადებაზე. ეს იქნება შემოდგომაზე", — განმარტა გამყრელიძემ.

საქართველოში კორონავირუსისგან კიდევ 19 ადამიანი გამოჯანმრთელდა და 11 დაინფიცირდა. ამის შესახებ მონაცემები Stopcov.ge-ზე ცოტა ხნის წინ განახლდა.

ბოლო მონაცემებით, ქვეყანაში სულ დადასტურებულია კორონავირუსის 794 შემთხვევა, მათ შორის გამოჯანმრთელებულია 624 ადამიანი, ხოლო გარდაცვლილია — 12. კარანტინის რეჟიმში 2 494 პირი რჩება, სტაციონარში მეთვალყურეობის ქვეშ — 301.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: