მარნეულისა და ჰუჯაბის ეპისკოპოსი, მეუფე გიორგი ჯამდელიანი მიიჩნევს, რომ მარნეულის ცენტრიდან ნარიმან ნარიმანოვის ძეგლის აღების შესახებ მისი განცხადებები დისკრიმინაციული არ არის. მისი თქმით, ძეგლის აღებასთან მისი არცერთი განცხადება არ იყო დისკრიმინაციის შემცველი და ამიტომ თავს ეთნიკური შუღლის გამღვივებლად არ მიიჩნევს.

"ამ ძეგლს აქტუალობა შესძინა ქალაქის მერმა, რომელმაც პანდემიის დროს, ამ გაჭირვების ჟამს მოიცალა და რატომღაც მისთვის პრიორიტეტი გახდა ბოლშევიკის, პირსისხლიანი წითელი კომისრის ძეგლის პატივითა და მარმარილოთი შემკობა.

ჩემი განცხადებების არცერთი სიტყვა არ იყო დისკრიმინაციის შემცველი ვინმე ეთნოსის მიმართ", — განუცხადა ჟურნალისტებს სასულიერო პირმა.

თუმცა, მარნეულის ეპისკოპოსის განცხადებებს გამოხმაურება მოჰყვა. საბჭოთა წარსულის კვლევის ლაბორატორიაში აღნიშნავენ, სასულიერო პირის განცხადება არ არის მიმართული ისტორიული პროცესების ფართოდ შეფასებისკენ და ნარიმან ნარიმანოვის პოლიტიკური მოღვაწეობის კრიტიკულად და ცივილურად გააზრებისაკენ. მათი შეფასებით, სახალხო თანხმობის გარეშე ძეგლების ჩამოხსნამ შესაძლოა უკუშედეგი გამოიღოს.

გუშინ, 30 მაისს, სახელმწიფო უსაფრთხოების სამსახურმა გაავრცელა ინფორმაცია, რომ რასობრივი დისკრიმინაციის მუხლით გამოძიება დაიწყო. უწყება არ დაუკონკრეტებიათ ვის მიმართ დაიწყო გამოძიება, თუმცა გამოძიების დაწყების ერთ-ერთ საფუძვლად იმასაც ასახელებენ, რომ მათი თქმით, გარკვეული პირები ცდილობენ სიტუაციის ისე წარმოჩენას, თითქოს ეთნიკურად ქართველებს ეთნიკურ უმცირესობებთან უპირატესობა ენიჭებათ.

სუს ამტკიცებს, რომ აქვს ოპერატიული ინფორმაცია, რომლის მიხედვით, ეს ადამიანები ცდილობენ ქვემო ქართლის და კახეთის რეგიონში ეთნიკურ ქართველებსა და აზერბაიჯანელებს შორის შუღლის გაღვივებას.

სუს-ის მიერ დაწყებულ გამოძიებასა და მის მიერ გაკეთებულ განცხადებებს შორის კავშირს ვერ ხედავს მარნეულის ეპისკოპოსი. მისი თქმით, სუს-ის განცხადებაში ის თავის თავს არ გულისხმობს.

"მე რა ვიცი ახლა სახელმწიფო უსაფრთხოების სამსახური რას გულისხმობს, ჩემთვის არის ბუნდოვანი და ორაზროვანი. მე რომ ვუკავშირებდე, მაშინ მე უნდა ვთვლიდე, რომ მე თითქოს ვახდენ სხვა ეთნიკური ჯგუფებისა და სხვა რელიგიური ჯგუფების დისკრიმინაციას და ეს არის სიცრუე და ტყუილი", — აცხადებს სასულიერო პირი.

ადამიანის უფლებათა სწავლებისა და მონიტორინგის ცენტრის იურისტი, თამთა მიქელაძე ამბობს, რომ სუს-ის განცხადება ულტრაკონსერვატიულ ჯგუფებს მიემართება. მისი თქმით, მათ აქვთ დოკუმენტური მასალები, რომელიც მარნეულის ეპარქიისა და ამ ჯგუფების თანამშრომლობას ადასტურებს.

"სუს-ის ეს განცხადება არსებითად მიემართება იმ ულტრაკონსერატიული ჯგუფების საქმიანობას, რომლებიც ბოლო პერიოდში ეთნიკურობის საკითხზე აგრესიულ კამპანიებს აორგანიზებენ. ეს თემა დაიწყო რამდენიმე ხნის წინ დავით გარეჯის საკითხთან დაკავშირებით, შემდგომში გაგრძელდა პანდემიის დროს მარნეულის სიტუაციაზე და დღეს უკვე მან ახალი ფორმები მიიღო ნარიმან ნარიმანოვის ძეგლთან დაკავშირებით. ძალიან სამწუხაროა, რომ ადგილობრივი მეუფის განცხადებები პირდაპირ და სინქრონულად გამოიყენეს ულტრაკონსრევატიულმა ჯგუფებმა", — განაცხადა მიქელაძემ რუსთავი 2-თან.