პრემიერმინისტრის, გიორგი გახარიას თქმით, თუ პირი ნახატს აბარებდა გალერეაში და მას თვითდასაქმებულის დახმარების აღებაზე უარი უთხრეს შეცდომაა. გახარიამ ამ თემაზე დეპუტატის კითხვას უპასუხა და უთხრა, რომ კონკრეტული სახელი და გვარი ტელეფონზე მიეწერა პრობლემის მოსაგვარებლად.

"რა თქმა უნდა, ეს შეცდომაა, თუ ასეთი შემთხვევა არსებობს და ამ ადამიანს უარი ეთქვა, კონკრეტული გვარი და ერთ დღეში ეს პრობლემა გადაწყდება. ეგ კი არა, რაღაც დანარიცხი, უბრალოდ ელემენტარული წერილი, რომ ადამიანს ჰქონდა შემოსავალი, ეს ყველაფერი თითქმის გადამოწმების გარეშე გაკეთდება. გვარი მომეცით და ხვალ გაუკეთდება, ჩემი ტელეფონი ხომ გაქვთ ?! მერწმუნეთ, რომ ერთ საათში მოუგვარდება ყველაფერი, სხვებიც მომწეროთ შეგიძლიათ, ეგეც არაა პრობლემა", — თქვა გიორგი გახარიამ.

დღეს, 27 მაისს პრემიერ-მინისტრი პარლამენტის წინაშე მოხსენებით წარსდგა. მან კორონავირუსის პანდემიის წინააღმდეგ გადადგმულ ნაბიჯებსა და უწყებათაშორისი საკოორდინაციო საბჭოს გატარებულ ზომებზე ისაუბრა.