ოკუპირებული აფხაზეთის ხელისუფლებამ ენგურის ხიდზე დე ფაქტო საზღვარი დროებით გახსნა მათთვის, ვინც მკურნალობას საქართველოს კონტროლირებად ტერიტორიაზე გადიოდა და სახლში დაბრუნება სურს. ეხო კავკაზას ინფორმაციით, ამის შესახებ დე ფაქტო რესპუბლიკის მთავარმა ექიმ-სანიტარმა, ლუდმილა სკორიკმა განაცხადა.

"მოქალაქეებმა, რომლებიც გადაკვეთენ საზღვარს, აუცილებლად თან უნდა იქონიონ კორონავირუსზე ლაბორატორიული შემოწმების საბუთი. მსგავსი დოკუმენტის არარსებობის შემთხვევაში კვლევისთვის ბიომასალას აიღებენ", — განაცხადა მან.

ამასთან, ყველა მოქალაქე, რომელიც ოკუპირებული აფხაზეთის ტერიტორიაზე შევა, თვითიზოლაციაში 14-დღიან კარანტინს გადის.

დე ფაქტო ხელისუფლებამ ენგურის ხიდზე ე.წ. საზღვარი კორონავირუსის პანდემიის გამო დაკეტეს. ამავე დროს, კორონავირუსი რუსეთიდან ჩასულ მოქალაქეებს აღმოუჩინეს.