შინაგან საქმეთა მინისტრის მოადგილემ, არჩილ თალაკვაძემ, პირველი არხის ეთერში, გადაცემა ინტერვიუში თქვა, რომ უახლოეს მომავალში სამინისტრო ურინოტესტირებას გააუქმებს:

"მინისტრის დავალებით ჩვენ ვმუშაობთ და უახლოეს მომავალში სამინისტროში გვექნება ახალი ტექნოლოგიები, რომელიც ურინოტესტირებას მთლიანად ჩაანაცვლებს და ადამიანს არანაირი ბიოლოგიური მასალის ჩაბარება აღარ მოუწევს. ეს საკითხი დღეს, თუ ხვალ გადაწყდება".

თალაკვაძის თქმით, ამჟამად ურინოტესტირება (შარდის ანალიზი) გამოიყენება იმისთვის, რათა დადგინდეს, პირი იმყოფება თუ არა ნარკოტიკული ნივთიერების ზემოქმედების ქვეშ. როგორც მინისტრის მოადგილემ განმარტა, პროცედურა ნებაყოფლობითია და მასზე უარის თქმა შესაძლებელია.

გენპუდი, 2 ივნისის მოძრაობა, თეთრი ხმაურის მოძრაობა და საქართველოს ნარკოპოლიტიკის ეროვნულ პლატფორმაში შემავალი სხვა ორგანიზაციები უკვე რამდენიმე წელია ითხოვენ სახელმწიფო ნარკოპოლიტიკის ლიბერალიზაციას. სხვა პრობლემურ საკითხებთან ერთად, მათი მოსაზრებით, ურინოტესტირება ადამიანის ღირსების შემლახავი, შეურაცხმყოფელი პროცედურაა.