დღეს, 25 მაისს მთავარი არხის დამფუძნებლის, გიორგი რურუას სასამართლო სხდომა პოლიციელის დაკითხვით გრძელდება. დაცვის მხარის თქმით, ეს არის მოწმე, რომელმაც რურუას მანქანა გაჩხრიკა და ბრალდებული დააკავა.

“დღეს დაიკითხება ბექა მახარაძე, პირი რომელმაც უშუალოდ ჩაუდო ცეცხლსასროლი იარაღი გიორგი რურუას. ის არის მნიშვნელოვანი მოწმე და ჩვენი პოზიცია იქნება ის, რომ გამოვააშკარაოთ მის მიერ ჩადენილი დანაშაული და ზოგადად ბრალდების მხარის მიერ ჩადენილი დანაშაული”, — ამბობს ადვოკატი დიმიტრი საძაგლიშვილი.

ადვოკატი, პროცესის დაწყებამდე ამბობს, რომ არ აქვს დაგეგმილი გათავისუფლების შუამდგომლობის დაყენება, თუმცა ბექა მახარაძის დაკითხვიდან გამომდინარე, შესაძლოა, ეს ადგილზე გადაწყვიტოს.

გიორგი რურუა ერთ-ერთია იმ პატიმრებს შორის, რომლის გათავისუფლებასაც ოპოზიცია მოითხოვს. ნაციონალური მოძრაობა და ევროპული საქართველო აცხადებენ, რომ ის პოლიტიკურ ნიშნითაა დაკავებული და მისი გათავისუფლების გარეშე საკონსტიტუციო ცვლილებებს მხარს არ დაუჭერენ.

გიორგი რურუას გათავისუფლების მოწოდებებს მმართველ პარტიას უგზავნიან ევროპარლამენტიდანაც. ევროპარლამენტარები აცხადებენ, რომ 8 მარტის შეთანხმება მთლიანად უნდა შესრულდეს.