ესპანეთის მთავრობა გეგმავს, ტურისტებისთვის საზღვრები ივლისისთვის გახსნას. Reuters-ის ცნობით, ამის შესახებ პრემიერ-მინისტრმა განაცხადა, რომელმაც, ასევე, შეზღუდვების შემსუბუქების მომდევნო ეტაპი დააანონსა.

"ივლისიდან უცხოელი ტურისტების მიმოსვლა უსაფრთხო ვითარებაში განახლდება. ჩვენ გარანტიას ვაძლევთ მათ რომ არ შევუქმნით რისკებს და არც ისინი შეგვიქმნიან", — განაცხადა პედრო სანჩესმა პრესონფერენციაზე. მას ამ თემის ირგვლივ დამატებით დეტალებზე აღარ უსაუბრია.

სანჩესმა, ასევე, განაცხადა, რომ 8 ივნისიდან ესპანეთის პრიმერა დივიზიონი — ლა ლიგა განახლდება, თუმცა მატჩები ცარიელ სტადიონებზე გაიმართება.

ესპანეთში გასული ღამის განმავლობაში კორონავირუსისგან 48 ადამიანი გარდაიცვალა. ჯამში გარდაცვლილთა რიცხვი კი 28 678-მდე გაიზარდა. მარტში კარანტინის გამოცხადების შემდეგ მილიონობით ადამიანმა დაკარგა სამსახური.