ფრაქცია დამოუკიდებელი დეპუტატების წევრი მარიამ ჯაში აცხადებს, რომ თუ ქართული ოცნება შეზღუდვების შესახებ კანონპროექტს პირველი მოსმენით მიიღებს, ისინი იძულებული იქნებიან ბოიკოტის რეჟიმში გადავიდნენ. ამის შესახებ დეპუტატმა პარლამენტში გამოსვლის დროს განაცხადა.

"სამწუხაროდ, ჩვენ ვხედავთ დღეს, რომ საქართველოს პარლამენტის უმრავლესობა აპირებს, კენჭი უყაროს პირველი მოსმენით ამ კანონპროექტს. რამდენადაც აღნიშნული კანონპროექტი იქნება ჩვენი ქვეყნის დემოკრატიისა და თავისუფლების გზაზე უკან გადადგმული ნაბიჯი და სერიოზულ კითხვის ნიშნებს ბადებს, ჩვენი ფრაქცია იღებს გადაწყვეტილებას არ მივიღოთ მონაწილეობა კენჭისყრაში და დავტოვოთ პლენარულ სხდომათა დარბაზი", — განაცხადა ჯაშმა.

სხდომათა დარბაზის დატოვების შემდეგ დეპუტატმა ჟურნალისტებთან განმარტა, რომ ბოიკოტის შემდეგ სხვა მექანიზმებით დარწმუნების პროცესზე გადავლენ:

"ეს იქნება საკონსტიტუციოში მიმართვა და ჩვენი ფრაქციის მიმართვა პრეზიდენტს, გამოიყენოს მის უფლებამოსილებაში არსებული ვეტოს უფლება".

პარლამენტში ინიცირებული კანონპროექტის მიხედვით, ხელისუფლებას გარკვეული უფლებები საგანგებო მდგომარეობის გამოცხადების გარეშე ეძლევა. მათ შორისაა მიმოსვლის, საკუთრების, სოციალური ღონისძიების მიზნით თავშეყრის შეზღუდვის შესაძლებლობაც. კანონპროექტის ავტორი ქართული ოცნების დეპუტატი დიმიტრი ხუნდაძეა. მას ორი კანონის შეცვლა სურს — კანონი საზოგადოებრივი ჯანმრთელობის შესახებ და სისხლის სამართლის საპროცესო კოდექსი.

ცვლილებებს პარლამენტი დაჩქარებული წესით განიხილავს. კანონპროექტის პირველი მოსმენა დღევანდელ პლენარულ სხდომაზეა დაგეგმილი, ხოლო სავარაუდოდ ხვალ, 22 მაისს, მეორე და მესამე მოსმენა იქნება, შემდეგ კი საბოლოო კენჭისყრა.