ევროკავშირის სადამკვირვებლო მისია საქართველოში (EUMM) კატეგორიულად უარყოფს ოკუპირებული ცხინვალის რეგიონის დე ფაქტო დაზვერვის სამსახურის გავრცელებულ ცრუ ცნობებს. საოკუპაციო რეჟიმი ამტკიცებს, რომ ქართველი სამართალდამცავები, სამედიცინო ბრიგადასთან ერთად, ცდილობდნენ მალულად ე.წ. გამყოფ ხაზიდან მოქალაქეთა ბიოლოგიური მასალა შეეგროვებინათ.

დე ფაქტო დაზვერვის სამსახური აცხადებს, რომ მათთვის შიდა საფრთხე "საქართველოდან საშიში ინფექციის შეტანაა" და იმასაც ამტკიცებს, რომ ბიოლოგიური მასალა რიჩარდ ლუგარის ლაბორატორიისთვის უნდოდათ, თუმცა განცხადებაში არ არის არცერთი არგუმენტი, რომელიც მსგავს ბრალდებას ამყარებს. "მტკიცებულებად" დე ფაქტო უწყებას მხოლოდ ფოტოები აქვს, სადაც გამყოფ ხაზთან სადამკვირვებლო მისიისა და სასწრაფო დახმარების მანქანები ჩანს საპატრულო პოლიციის გარეშე.

EUMM აცხადებს, რომ ეს მისიის წინააღმდეგ მიმართული უპასუხისმგებლო დეზინფორმაციის მორიგი მაგალითია. მათი განმარტებით, პატრული ჩატარდა გეგმის მიხედვით, არცერთ მოქალაქესთან არავითარი კონტაქტი არ ყოფილა, არანაირი ნიმუშები არ აუღიათ და ამის განზრახვაც არ არსებობს. მათივე თქმით, სასწრაფოს მანქანა დაარსების დღიდან ახლავთ.

"20 მაისს, სამხრეთ ოსეთის მედიაში გამოქვეყნებულ ცნობებში, რომელშიც მთავარი აქცენტი საქართველოში რ. ლუგარის სახელობის საზოგადოებრივი ჯანდაცვის კვლევით ცენტრზეა გაკეთებული, არაზუსტად და მცდარად აისახა 26 აპრილს ევროკავშირის სადამკვირვებლო მისიის ქმედება სამხრეთ ოსეთის ადმინისტრაციული სასაზღვრო ხაზის გასწვრივ.

წინასწარი სიფრთხილის სტანდარტული ზომაა, რაც ჩვენი თანამშრომლებზე ზრუნვის ვალდებულების ნაწილია, რათა საჭიროების შემთხვევაში, მათ სწრაფად შეძლონ აუცილებელი დახმარების გაწევა, მაგალითად, ავტოსაგზაო შემთხვევის დროს. ეს განსაკუთრებით მნიშვნელოვანია ისეთ ადგილებში პატრულირებისას, სადაც სწრაფი სამედიცინო დახმარების მიღება რთულად მისაწვდომია", — წერია განცხადებაში.

EUMM-ს განცხადებით, ყველა მხარემ, მათ შორის სამხრეთ ოსეთის მონაწილეებმა, იციან ეს ფაქტები, რომლებიც მათ აუხსნეს ცხელი ხაზის მეშვეობით 26 და 27 აპრილს და ადრეც მრავალი წლის განმავლობაში.ევრო

"საქართველოში ევროკავშირის სადამკვირვებლო მისია ყოველდღიურად აკვირდება ვითარებას ადგილზე სამხრეთ ოსეთის ადმინისტრაციული სასაზღვრო ხაზის გასწვრივ. ჩვენი მისია მუდმივად პატრულირებს მიმდინარე პანდემიის დროს. ჩვენი მიდგომა არის სრულად მიუკერძოებელი", — აცხადებენ ისინი.