ქართული ოცნების ყოფილი წევრის, ეკა ბესელიას განცხადებით, ჯანდაცვის ლოზუნგით და დროშის ქვეშ ადამიანის უფლებების ფეხქვეშ გათელვა ავტორიტარულ მმართველობას ახასიათებს. ასე ეხმაურება დეპუტატი დიმიტრი ხუნდაძის მიერ ინიცირებულ კანონპროექტს, რომელიც საგანგებო მდგომარეობის გამოცხადების გარეშე შეზღუდვების დაწესებას ითვალისწინებს.

"ეჭვი მაქვს, ეს კანონპროექტი არაა იმ ადამიანების დაწერილი, ვინც მას ხელს აწერს. არ მახსოვს, იურიდიულ და ადამიანის უფლებათა კომიტეტს არც კი განეხილოს ასეთი კანონპროექტი. აქ ჯანდაცვის კომიტეტი არაა წამყვანი კომიტეტი", — ამბობს ბესელია.

პარლამენტში ინიცირებული კანონპროექტის მიხედვით, ხელისუფლებას გარკვეული უფლებები საგანგებო მდგომარეობის გამოცხადების გარეშე ეძლევა. მათ შორისაა მიმოსვლის, საკუთრების, სოციალური ღონისძიების მიზნით თავშეყრის შეზღუდვის შესაძლებლობაც. კანონპროექტის ავტორი ქართული ოცნების დეპუტატი დიმიტრი ხუნდაძეა. მას ორი კანონის შეცვლა სურს — კანონი საზოგადოებრივი ჯანმრთელობის შესახებ და სისხლის სამართლის საპროცესო კოდექსი.

ცვლილებებს პარლამენტი დაჩქარებული წესით განიხილავს. კანონპროექტის პირველი მოსმენა დღევანდელ პლენარულ სხდომაზეა დაგეგმილი, ხოლო სავარაუდოდ ხვალ, 22 მაისს, მეორე და მესამე მოსმენა იქნება, შემდეგ კი საბოლოო კენჭისყრა.