"ღმერთის არ გწამთ?" — ამ შინაარსის ბანერით პარტია გირჩის ლიდერი, ზურა ჯაფარიძე საპატრიარქოსთან მივიდა. აქცია პერფორმანსის დროს მან აღნიშნა, რომ საპატრიარქოსთან კითხვა ჰქონდა და პასუხის მიღება სურდა, თუმცა უწყებიდან მისთვის არავის უპასუხია.

On.ge-სთან საუბრისას ჯაფარიძემ თქვა, რომ დღევანდელი პროტესტი ტყის კოდექსში შესატან ცვლილებებს უკავშირდებოდა. მისი თქმით, ზოგადად ტერიტორიას თუ დავაჯამებთ, დაახლოებით, გურიაზე მეტი ფართობის მიწის დაკანონებას შეძლებენ ეკლესიები.

"საპატრიარქო პოლიტიკური ორგანიზაციისგან, რომელიც ვაჭრობს ჩვეულებრივად საარჩევნო ხმებით, პოლიტიკითაა დაკავებული და ცხადია, რომ მიწის, ტყეების გადაცემაც ეს არის და სხვა არაფერი, შანსი მაინც უნდა მიეცეს, რომ იქცეს რელიგიურ ორგანიზაციად. ამისთვის ვაპირებ მათ შორის პარლამენტში თუ მოვხვდები ბრძოლას", — თქვა ზურა ჯაფარიძემ.

ჯაფარიძემ აღნიშნა, რომ აუცილებელია, სახელმწიფოსა და საპატრიარქოს შორის კონკორდატი გაუქმდეს და ორგანიზაციას პრივილეგიები მოეხსნას. მისი თქმით, ჯერ მოფიქრებული არ აქვს კონკრეტულად რა ფორმით გააგრძელებს პროტესტს, თუმცა ამ საკითხზე ბრძოლას მომავალშიც აპირებს.

20 მაისს, გარემოს დაცვის კომიტეტმა მხარი დაუჭირა ცვლილებებს ტყის კოდექსში, რომელიც საპატრიარქოსთვის ეკლესია-მონასტრების მიმდებარედ არაუმეტეს 20 ჰექტარი ტყის ფართობის გადაცემას ითვალისწინებს.

კომიტეტზე ცვლილებები დღეს მესამე მოსმენით გავიდა. გარემოს დაცვისა და სოფლის მეურნეობის სამინისტროს წარმომადგენელმა მოხსენების დროს თქვა, რომ სიცრუეა, თითქოს ხელისუფლება საპატრიარქოს ტყეებს საარჩევნოდ გადასცემს. მან აღნიშნა, რომ მიზანი ტყის მოვლა და მომავალი თაობებისთვის შენახვაა.

კომიტეტების მხარდაჭერის შემდეგ, ცვლილებები პლენარულ სხდომაზე უნდა გავიდეს. იმ შემთხვევაში, თუ კანონპროექტს დეპუტატები მხარს დაუჭერენ, საქართველოს მართლმადიდებელი ეკლესიის საპატრიარქოს საკუთრებაში შეიძლება გადაეცეს საქართველოში არსებული ყველა ეკლესია-მონასტრის მიმდებარე ტყის ფართობი, არაუმეტეს 20 ჰექტრისა თითოეულის შემთხვევაში.

ტყის კოდექსის შესახებ არაერთი განცხადება გაავრცელეს არასამთავრობო ორგანიზაციებმა. ისინი ცვლილებების ამ ფორმით მიღებას ეწინააღმდეგებიან. ტოლერანტობის და მრავალფეროვნების ინსტიტუტის (TDI) განცხადებით, ინიციატივა დამატებით ქონებრივ და ფინანსურ პრივილეგიებს ანიჭებს დომინანტ რელიგიურ ორგანიზაციას, ასევე, არღვევს სახელმწიფოსა და რელიგიის ურთიერთგამიჯვნის კონსტიტუციურ პრინციპს.

TDI აღნიშნავს, რომ სახელმწიფოს მიერ საპატრიარქოსთვის გადაცემული ქონებისა და დაფინანსების მასშტაბი წინაასარჩევნო პერიოდებში იზრდება. მათივე შეფასებით, ეს ხელისუფლების მხრიდან გავლენიანი ინსტიტუტის მიერ პოლიტიკური მხარდაჭერის სურვილით შეიძლება აიხსნას.

კიდევ ერთი არასამთავრობო ორგანიზაციის, ადამიანის უფლებების სწავლებისა და მონიტორინგის ცენტრის (EMC) შეფასებით ცვლილებები ეწინააღმდეგება ფუნდამენტურ კონსტიტუციურ პრინციპებს და მათივე განცხადებით, იგი სტრატეგიული ბუნებრივი რესურსების მართვის და განაწილების უსამართლო პრაქტიკას ქმნის.

EMC-შიც ვარაუდობენ, რომ მართლმადიდებელი ეკლესიისთვის დამატებითი პრივილეგიების გადაცემის ამ ინიციატივას, სავარაუდოდ, წინასაარჩევნო კონტექსტში საპატრიარქოს ლოიალობის მოპოვების ინტერესი აქვს.

ამ დროისთვის უცნობია, როდის იგეგმება ტყის კოდექსის განხილვა პლენარულ სხდომაზე.