პარლამენტის დამოუკიდებელი დეპუტატის, თამარ ჩუგოშვილის თქმით, პრეზიდენტის მხრიდან უგულავა-ოქრუაშვილის შეწყალება ხელისუფლების შეცდომების აუცილებელი საფასური იყო. ამ თემაზე მან TV პირველის ეთერში ისაუბრა და აღნიშნა, რომ პრეზიდენტის მიმართ რეაქციები უსამართლო იყო.

"ეს იყო აუცილებელი საფასური იმ შეცდომებისთვის, რომელიც ხელისუფლებამ დაუშვა, სხვა გზა აღარ იყო, ეს იყო აუცილებელი სახადი, ნაბიჯი, რომელიც უნდა გადამდგარიყო, მან ეს საკუთარ თავზე აიღო, ამიტომ სწორად მოიქცა", — თქვა თამარ ჩუგოშვილმა.

ქართული ოცნების ყოფილი წევრის თქმით, ელოდა, რომ მმართველი გუნდი იტყოდა: "ეს მისი გადაწყვეტილებაა, დამოუკიდებელია, ჩვენ პატივს ვცემთ, რომ მან ნაბიჯი გადადგა დაძაბული სიტუაციის განსამუხტად". მისი თქმით, პრეზიდენტმა გუნდის რეაქციები შეურაცხყოფად მიიღო.

პრეზიდენტმა გუშინ, 19 მაისს ინტერვიუში აღნიშნა, რომ უგულავა-ოქრუაშვილის შეწყალებაზე გადაწყვეტილება პარტიის თავმჯდომარეს, პარლამენტის თავმჯდომარესა და პრემიერს წინასწარ შეატყობინა.

ქართული ოცნების ლიდერები ამ დრომდე აცხადებდნენ, რომ მათ პრეზიდენტის გადაწყვეტილება პირდაპირ ეთერში, ტელევიზორის საშუალებით გაიგეს და ეს ყველაფერი მათთვის მოულოდნელი აღმოჩნდა. პრემიერის მრჩეველმა, სოზარ სუბარმა ამ თემასთან დაკავშირებით აღნიშნა, რომ გადაწყვეტილება არათუ მოულოდნელი იყო, ამის განცდაც კი არ ჰქონია. თავად პრემიერმა კი შეწყალებას უკიდურესად მძიმე უწოდა.

პარტიის სხვა ლიდერებმა შეწყალებაზე თქვეს, რომ გადაწყვეტილებას "გულდასაწყვეტი" და "არაპოპულარული" უწოდეს. დეპუტატმა მამუკა მდინარაძემ აღნიშნა, რომ ეს არასწორი გადაწყვეტილება იყო, ხოლო ირაკლი კობახიძის მტკიცებით, პრინციპულად არ ეთანხმებიან სალომე ზურაბიშვილის, რომ ორი პოლიტიკოსის ციხეში ყოფნა ქვეყანას საფრთხეს შეუქმნიდა.

სალომე ზურაბიშვილმა ოპოზიციის ლიდერები, გიგი უგულავა და ირაკლი ოქრუაშვილი 15 მაისს შეიწყალა. მან აღნიშნა, რომ ის არ იწყალებს პოლიტპატიმრებს, რადგან ისინი ქვეყანას არ ჰყავს და ეს შეწყალება ჩვეულებრივ ჰუმანურ პრინციპებს არ ეფუძნება. მისი განმარტებით, გადაწყვეტილება მიიღო, რადგან ქვეყანა პოლიტიკური კრიზისის წინაშე იდგა და პრეზიდენტი ვერ დაუშვებდა პოლიტიზაციასა და დაპირისპირებას.

პრეზიდენტის გადაწყვეტილება წინ გადადგმულ ნაბიჯად შეაფასეს საერთაშორისო პარტნიორებმა და ხელისუფლებას მოუწოდეს, რომ შეთანხმება სრულად შეასრულოს.

გაიგეთ მეტი: