ერთ-ერთი ყველაზე მნიშვნელოვანი თანამედროვე კინორეჟისორის, იორგოს ლანთიმოსის მოყვარულებისთვის განსაკუთრებული სიახლეა: რეჟისორი ახალ ფილმზე იწყებს მუშაობას.

ახალ ფილმს ლანთიმოსი ამერიკელი მწერლის რიჩარდ ბროტიგანის 1974 წელს გამოქვეყნებული რომანის The Hawkline Monster მიხედვით იღებს, რომელიც გოთიკისა და ვესტერნის ჟანრების პაროდიას წარმოადგენს.

ამ წარმოშობით ბერძენმა რეჟისორმა ბოლო სრულმეტრაჟიანი კინოსურათი 2018 წელს გამოუშვა — The Favourite, რომელმაც მაყურებლების მოწონებასთან ერთად, არაერთი ჯილდო დაიმსახურა, მათ შორის ოსკარის 10 ნომინაცია.

ახალ ფილმზე ლანთიმოსი კვლავ ამ გახმაურებული კომედიური დრამის სცენარისტთან, ტონი მაკნამარასთან ერთად იმუშავებს. მაკნამარამ იმუშავა ასევე სულ ახლახანს გამოსული სერიალის The Great სცენარზე, რომელშიც ელ ფენინგი და ნიკოლას ჰოლტი თამაშობენ.

აღსანიშნავია, რომ The Hawkline Monster-ის მიხედვით წლების განმავლობაში სხვადასხვა რეჟისორი აპირებდა ფილმის გადაღებას, მათ შორის ტიმ ბარტონი, რომელსაც სურდა, რომ ფილმში ჯეკ ნიკოლსონსა და კლინტ ისტვუდს ეთამაშათ.

ჯერჯერობით უცნობია, თუ რომელ მსახიობებს ვიხილავთ ლანთიმოსის ამ ამბიციურ პროექტში, თუმცა თამამად შეგვიძლია ვივარაუდოთ, რომ იმედი ნამდვილად არ გაგვიცრუვდება.

ლანთიმოსის შემოქმედების მოყვარულებს ასევე არ უნდა გამორჩეთ მხედველობიდან, რომ რეჟისორი სერიალის გადაღებასაც აპირებს: ამის შესახებ ინფორმაცია ჯერ კიდევ გასულ წელს გავრცელდა, თუმცა ახალი დეტალები ჯერჯერობით უცნობია.