დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

პაციენტს, რომელსაც PCR ტესტით კორონავირუსზე უარყოფითი პასუხი ჰქონდა და კლინიკიდან გამოჯანმრთელებული გაწერეს, ინფიცირება მეორედ დაუდასტურა. საჩხერის კლინიკის დირექტორის, მიხეილ ქამუშაძის განცხადებით, პაციენტი პროტოკოლის მიხედვით, ორჯერ გატესტეს და მხოლოდ ამის შემდეგ გაწერეს, თუმცა, დაახლოებით, 10-12 დღეში ჩატარებულმა ხელახალმა ტესტმა Covid-19-ზე დადებითი შედეგი აჩვენა.

On.ge-სთან საუბრისას მიხეილ ქამუშაძე განმარტავს, რომ კლინიკიდან გაწერის შემდეგ პირი იზოლაციაში იმყოფებოდა და ის ხელახლა ვერ დაინფიცირდებოდა. ის არ გამორიცხავს, რომ პაციენტში ვირუსის მაჩვენებელი სუსტად დადებითი ყოფილიყო, თუმცა ტესტის შედეგზე ეს არ ჩანდა.

"ერთი ქეისი იყო, უბრალოდ, სხვადასხვა პასუხებით. მეორედ ინფიცირება ცალსახად შეგვიძლია ვთქვათ, რომ არ ყოფილა, რადგან იზოლაციაში იყო და კონტაქტი არ ჰქონია. სავარაუდოდ, იყო სუსტად დადებითი, მაგრამ დადასტურებული მაქვს, რომ იყო უარყოფითი. ვერ ვიტყვი ზუსტად რა მიზეზი შეიძლება იყოს", — განაცხადა მან.

ქამუშაძის განცხადებით, ტესტირება პაციენტს იმერეთის ლაბორატორიაში ჩაუტარდა. მისივე თქმით, მსგავსი შემთხვევა კლინიკაში ჯერ არ ჰქონიათ.

19 მაისის მონაცემებით, ქვეყანაში კორონავირუსით ინფიცირების 707 შემთხვევაა დაფიქსირებული, მათგან გამოჯანმრთელებულია 456, ხოლო გარდაცვლილია 12 ადამიანი. კარანტინის რეჟიმში 3 914 პირი რჩება, სტაციონარში მეთვალყურეობის ქვეშ კი — 340.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: