საქართველოს შინაგან საქმეთა სამინისტროს ინფორმაციით, ქუთაისში პოლიციელს სიტყვიერად და ფიზიკურად დაუპირისპირდა ადამიანი, რომელსაც კომენდანტის საათის შემდეგ გარეთ ყოფნის გამო შენიშვნა მისცეს. უწყებაში ამბობენ, რომ ამის შემდეგ მისი დაკავება სცადეს, თუმცა მეზობლებმა ამის საშუალება არ მისცეს და პოლიციელებს ისინიც დაუპირისპირდნენ სიტყვიერად და ფიზიკურად.

"შინაგან საქმეთა სამინისტროს ქუთაისის საქალაქო სამმართველოს თანამშრომლები, საგანგებო რეჟიმის აღსრულების მიზნით, კომენდანტის საათის დროს შემოვლას ახორციელებდნენ, რა დროსაც მათ ნიკეას ქუჩაზე მდებარე საცხოვრებელ კორპუსთან შენიშნეს მოქალაქე, რომელიც არღვევდა კომენდანტის საათს. პოლიციის თანამშრომლებმა მოქალაქეს სიტყვიერი გაფრთხილება მისცეს და წესრიგის დაცვისკენ მოუწოდეს. ი.ჯ.-მ არ გაითვალისწინა პოლიციის მითითება და სამართალდამცველებს სიტყვიერი და ფიზიკური შეურაცხყოფა მიაყენა. ინციდენტში ჩაერთნენ ი.ჯ.-ს მეზობლები, რომლებმაც პოლიციელებს არ მისცეს საშუალება, დაეკავებინათ სამართალდამრღვევი, სამართალდამცველებს მიაყენეს სიტყვიერი და ფიზიკური შეურაცხყოფა, რა დროსაც სხეულზე სხვადასხვა სახის დაზიანებები მიიღეს პოლიციის თანამშრომლებმა", — აღნიშნავენ უწყებაში.

შსს პოლიციელების დაზიანების ამსახველ ფოტოებსაც აქვეყნებს.

ფოტო: შსს

მთავარი არხის ინფორმაციით, პოლიციასა და მოქალაქეებს შორის დაპირისპირების დროს დაშავდნენ კორპუსში მცხოვრები ადამიანებიც, მათ შორის ბავშვები. ვრცელდება მათი დაზიანებების ფოტოებიც:

ფოტო: მთავარი არხი

ადგილობრივების ინფორმაციით, კომენდანტის საათის დარღვევის გამო, პოლიციას რამდენიმე ადამიანის დაჯარიმება სურდა, რომლებმაც უთხრეს, რომ სოციალურად დაუცველები არიან. ისინი ჰყვებიან, რომ პოლიციამ მაინც გადაწყვიტა დაჯარიმება, ამიტომ მოქალაქეებმა მეზობლების დახმარება ითხოვეს, რასაც მოჰყვა დაპირისპირება. მათივე თქმით, პოლიციელები მოქალაქეებს ფიზიკურად გაუსწორდნენ და ამ დრომდე უცნობია, სად არის 22 წლის კაცი, რომლის დაკავებასაც თავდაპირველად ცდილობდნენ.

შსს ამბობს, რომ ბრალდებულს ეძებს და ის ძარცვისთვის პირობითი მსჯავრის ქვეშ იმყოფება. უწყების ინფორმაციით, გამოძიება სისხლის სამართლის კოდექსის 353-მუხლით დაიწყო, რაც პოლიციის თანამშრომლის მიმართ წინააღმდეგობას და საზოგადოებრივი წესრიგის დაცვისათვის ხელის შეშლას გულისხმობს.