სამეცნიერო ფანტასტიკის ჟანრის ცნობილი ფილმების სერიის The Matrix ერთ-ერთ შემქმნელს, ლილი ვაჩოვსკის სულაც არ გაუხარდა, რომ ილონ მასკმა და ივანკა ტრამპმა ფილმიდან ცნობილი ფრაზა გამოიყენეს.

ყველაფერი დაიწყო იქიდან, რომ 17 მაისს Tesla-სა და SpaceX-ის აღმასრულებელმა ხელმძღვანელმა, ილონ მასკმა ვარდის ემოჯით ფარული შინაარსის პოსტი გამოაქვეყნა ტვიტერზე: "მიიღე წითელი აბი".

როგორც ბევრმა კინომოყვარულმა კარგად იცის, ფრაზა "მიიღე წითელი აბი" ცნობილი რეფერენსია დები ვაჩოვსკების ბლოკბასტერიდან მატრიცა. ფილმში მთავარ გმირ ნეოს ორ არჩევანს სთავაზობენ: მიიღოს ლურჯი აბი, დაუბრუნდეს ძველ ცხოვრებას და დაივიწყოს ყველაფერი, ან დალიოს წითელი აბი და გაიგოს ყველაფერი ყალბი რეალობის შესახებ.

Variety-ის ცნობით, ამ ფრაზამ ბოლო დროს ინტერნეტმომხმარებლებში სხვა მნიშვნელობა შეიძინა და ხშირად მას კონსერვატიული პოლიტიკური ღირებულების გამოსახატავად იყენებენ: სხვადასხვა ჯგუფები ამ ფრაზით მკვეთრად მემარჯვენე იდეებს, მაგალითად დონალდ ტრამპის მხარდაჭერას ან "კაცების უფლებების დამცველი" მოძრაობის იდეებს გამოხატავენ.

ილონ მასკის ამ პოსტს დიდი გამოხმაურება მოჰყვა, მათ შორის აშშ-ის ამჟამინდელი პრეზიდენტის დონალდ ტრამპის შვილის, ივანკა ტრამპის, რომელმაც მასკს ასე უპასუხა: "უკვე მიღებულია!"

ეს ყველაფერი კი შეუმჩნეველი არ დარჩენია თავად მატრიცის შემოქმედს, ლილი ვაჩოვსკის, რომელიც ამ ორი ცნობილი ადამიანის ინტერაქციას არც ისე კმაყოფილი გამოეხმაურა: "შეგე*ით ორივეს".

როგორც უკვე ვიცით, მალე კინოთეატრებში მატრიცას ახალ ნაწილს ვიხილავთ, თუმცა მის გადაღებაზე მხოლოდ ლანა ვაჩოვსკი მუშაობს, მისი და, ლილი ვაჩოვსკი ახალი ფილმის შექმნაში ჩართული არ არის.