ზუგდიდში, კორონავირუსით ინფიცირებული სატვირთო მანქანის მძღოლის დედასა და ორ შვილს ვირუსი დაუდასტურდა. ამის შესახებ ინფორმაცია დაავადებათა კონტროლის ეროვნული ცენტრის სამეგრელო-ზემო სვანეთის ხელმძღვანელმა, ანზორ ქობალიამ გაავრცელა.

მისი თქმით, დღეს კვლევა ინფიცირებულის 7 კონტაქტს ჩაუტარდა, მათგან 3 კი ვირუსი აღმოაჩნდა. კორონავირუსი არ უდასტურდება ინფიცირებულის ცოლს.

ანზორ ქობალიას თქმით, პაციენტის კონტაქტები საკარანტინო სივრცეში არიან განთავსებული და მათ უახლოეს პერიოდში სამედიცინო დაწესებულებაში გადაიყვანენ, თუმცა ზუსტად არ იცის სად. მისივე თქმით, ინფიცირებული კაცი, რომელმაც რუხის საავადმყოფოს თავად მიმართა თბილისში გადაიყვანეს.

ანზორ ქობალიას განცხადებით, პაციენტის კონტაქტების კვლევა ამ დრომდე მიმდინარეობს და ზუგდიდში ხვალ ტესტს მინიმუმ 12 კონტაქტს ჩაუტარებენ. ზუგდიდში სატვირთო მანქანის მძღოლს თვითიზოლაციის ვადის გასვლის შემდეგ კორონავირუსი დაუდგინდა.

16 მაისის მონაცემებით, საქართველოში კორონავირუსის 683 დადასტურებული შემთხვევაა, მათგან გამოჯანმრთელებულია 419 ადამიანი, ხოლო გარდაცვლილია12.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: