პრეზიდენტმა სალომე ზურაბიშვილმა გიგი უგულავა და ირაკლი ოქრუაშვილი შეიწყალა. ამის შესახებ მან დღეს გამართულ ბრიფინგზე განაცხადა.

როგორც მან განმარტა, არ იწყალებს პოლიტპატიმრებს, რადგან დღეს საქართველოში პოლიტპატიმრები არ არსებობენ.

ზურაბიშვილმა ასევე მიუთითა, რომ შეწყალება არ ნიშნავს სასამართლო განაჩენის გადასინჯვას და დამნაშავე დამნაშავედ რჩება.

"არ ვიწყალებ პოლიტპატიმრებს, რამეთუ საქართველოში არ არსებობენ პოლიტპატიმრები. დღეს, საბედნიეროდ, ვცხოვრობთ დემოკრატიულ სახელმწიფოში. პოლიტიკოსს, რომელიც მძიმე და ყველასთვის ცნობილი სისხლის სამართლის დანაშაულის ჩადენისთვის ციხეში სასჯელს იხდის, პოლიტპატიმარი არ ეწოდება, იგი მხოლოდ და მხოლოდ დამნაშავე პოლიტიკოსია. ამ თემით სპეკულირება ქვეყნის დისკრედიტაციას ემსახურება, მიუღებელია და უნდა დასრულდეს. შეწყალება არ ნიშნავს სასამართლო განაჩენის გადასინჯვას, ან გადაფასებას, დამნაშავე დამნაშავედ რჩება, სასჯელისგან თავისუფლდება და არა დანაშაულისგან", — განაცხადა სალომე ზურაბიშვილმა.