ევროპული საქართველოს წევრის, სერგო რატიანის შეფასებით, განათლების მინისტრის მიერ წარმოდგენილი განათლების სისტემის ანტიკრიზისული გეგმა, თვითკმაყოფილების უცნაური პრეზენტაცია იყო.

როგორც რატიანი ამბობს, პრეზენტაციისას საუბარი მხოლოდ იმაზე იყო, რომ მთავრობა იმით, რაც განათლების სისტემაში ხდება, კმაყოფილია.

მისი თქმით, გასაკვირია, რომ სერიოზულ გამოწვევებზე, მათ შორის ეროვნული გამოცდების ჩატარების ფორმატის ცვლილებაზე საუბარი არ იყო.

რატიანის თქმით, პანდემია ივლისში არ გაქრება და ამიტომ, განათლების სისტემა მომზადებული უნდა ყოფილიყო და ეროვნულ გამოცდებზე აბიტურიენტებისთვის რამდენიმე საგნის კომბინირებული გამოცდა მოემზადებინა. მისი განმარტებით, შესაძლებელი იყო თუნდაც 3 სავალდებულო საგნის 1 კომბინირებულ გამოცდაზე გაერთიანება.

"მაშინ როცა მოსახლოებას და საზოგადოებას უშლიან, რომ ოჯახის სამი წევრი ჩაისვან მანქანაში, საუბარია, რომ ივლისში 40 ათასი აბიტურიენტის უნდა გადანაწილდეს დიდ საგამოცდო ცენტრებში და არაფერი არ იცვლება, ეს შემაშფოთებელია", — განაცხადა რატიანმა.

რატიანს, ასევე, შენიშვნები აქვს დისტანციური სწავლებისას შეფასებასთანაც, მისი თქმით, ეს განათლების სამინისტროს კანონში აქამდე უნდა ჩაეწერა.

ამასთან ერთა, რატიანი აცხადებს, რომ ტელესკოლის გაკვეთილები 15 ივნისს არ უნდა შეწყდეს და უნდა გაგრძელდეს.

დღეს, 15 მაისს განათლების ანტიკრიზისული გეგმის წარდგენისას გიორგი გახარიამ განაცხადა, რომ საქართველოში ეროვნული გამოცდები ჩვეულ რეჟიმში ჩატარდება და მათი თარიღი ივნისში გამოცხადდება.

განათლების მინისტრმა, მიხეილ ჩხენკელმა თქვა, რომ ეროვნულ გამოცდების მხოლოდ თარიღი შეიძლება შეიცვალოს და აგვისტოში ჩატარდეს. მანვე განმარტა, რომ ეს მხოლოდ ეპიდსიტუაციაზე და ექიმების რეკომენდაციებზე იქნება დამოკიდებული. მისივე თქმით, ჯანდაცვის სფეროს პროტოკოლით, ეროვნული გამოცდების ჩატარებისას ერთ სივრცეში არაუმეტეს 10 აბიტურიენტი იქნება.