დაავადებათა კონტროლის ეროვნული ცენტრის ხელმძღვანელის მოადგილის თქმით, არ აქვთ მოლოდინი, რომ სექტემბრისთვის სასწავლო პროცესი ვერ განახლდება. ამის შესახებ პაატა იმნაძემ დღეს გამართულ პრესკონფერენციაზე განაცხადა.

თუმცა, იმნაძემ ასევე აღნიშნა, რომ მაღალი ალბათობით, კორონავირუსი ზამთარში კვლავ იქნება.

"არ ველოდებით, რომ სექტემბერში სწავლა ვერ განახლდება. ზაფხული და შემოდგომის დასაწყისი ძალიან დიდი ალბათობით, იმედი გვაქვს, რომ იქნება შედარებითი სიმშვიდის და სიწყნარის პერიოდი კორონავირუსთან დაკავშირებით. თუმცა, სამწუხაროდ, ასეთია მსოფლიო მეცნიერების პროგნოზები, რომ კორონავირუსის გაქრობის იმედი არ უნდა გვქონდეს. თუ ჩვენ არ გვექნა ეფექტიანი ანტივირუსული საშუალება ზამთრისათვის, თუ ჩვენ არ გვექნა ვაქცინა, რომელიც ასევე ნაკლებ მოსალოდნელია, რომ უკვე ზამთრისთვის იყოს დედამიწის მოსახლეობისათვის, რა თქმა უნდა, დიდი ალბათობა არსებობს იმის, რომ ზამთარში კორონავირუსი ისევ მოტრიალდება", — თქვა მან.

მანვე აღნიშნა, რომ ცუდი სცენარისთვის მზად უნდა ვიყოთ, რადგან "ყოველთვის ჯობია მზად იყო, ვიდრე მოუმზადებელი დახვდე რაღაც საფრთხეს".

ამავე პრესკონფერენციაზე დაავადებათა კონტროლის ცენტრის გადამდებ დაავადებათა დეპარტამენტის ხელმძღვანელმა, ხათუნა ზახაშვილმა თქვა, რომ ერთადერთ საშუალებად ისევ რჩება პრევენციული ღონისძიებები.

"სასწავლო და სააღმზრდელო დაწესებულებებს უნდა ჰქონდეთ მზაობა, რათა სწორად მოხდეს ყოველდღიურად ბავშვების მიღება, გამოუმუშავონ მათ სწორი ჰიგიენური წესები, რათა დაცული იყოს მათი ჯანმრთელობა და ეს საჭიროა არამარტო კორონავირუსისგან დასაცავად, არამედ სხვა უამრავი დაავადებისგან", — თქვა მან.

NCDC-ის დირექტორმა, ამირან გამყრელიძემაც აღნიშნა, რომ პირადი და საზოგადოებრივი ჰიგიენა არის ერთ-ერთი მთავარი იარაღი ამ ტიპის დაავადების პრევენციისთვის.

"კარგი გაკვეთილი მივიღეთ და ეს ზაფხული უნდა გამოვიყენოთ იმისთვის, რომ მეტი მზადყოფნა გვქონდეს შემოდგომის მიწურულისთვის", — დასძინა მან.