ეკონომიკის მინისტრის, ნათია თურნავას განცხადებით, ტურისტებისთვის უსაფრთხო კორიდორთან დაკავშირებით რუსეთთან მოლაპარაკებები ამ დროისთვის არ მიმდინარეობს. ამ თემაზე თურნავამ კითხვას მთავრობის ბრიფინგზე უპასუხა.

"ამ წუთში რუსეთთან მოლაპარაკებები არ მიმდინარეობს მაგრამ როგორც ადრე, რუსეთიდან წამოსული ტურისტები იყო მნიშვნელოვანი ნაწილი ჩვენი ვიზიტორების, დღესაც ჩვენი ქვეყანა ყველა უსაფრთხოების ზომის დაცვით, მზადაა მათ შორის რუსი ტურისტები მიიღოს და უმასპინძლოს", — თქვა ნათია თურნავამ.

მინისტრმა აღნიშნა, რომ როცა ქვეყნებთან ტურისტულ დერეფნებზე მოლაპარაკებები შედგება, საქართველოს ექნება ყველა გარანტია, რომ ვიზიტორებისა და ქვეყნის უსაფრთხოებას დაიცავენ.

დღეს, 7 მაისს მთავრობამ ანტიკრიზისული გეგმის კიდევ ერთი ეტაპი წარადგინა, რომლის მიხედვითაც შეზღუდვების ნაწილი უფრო ადრე მოიხსნება. მაგალითად, 11 მაისიდან მოძრაობა აღდგება თბილისში, 14 მაისიდან რუსთავსა და გარდაბანში, ხოლო 18 მაისიდან სრულად გაიხსნება მარნეული.

11 მაისიდან ყველა სახის წარმოება და მაღაზიების ნაწილი გაიხსნება, ეს არ ეხებათ სავაჭრო მოლებს. გახარიას თქმით, 15 ივნისიდან ამოქმედდება შიდა ტურიზმი, 1 ივნისიდან კი საქართველო უცხოელი ტურისტების მისაღებად მზად იქნება.

გაიგეთ მეტი: