რუსეთში, ვორონეჟის ოლქში სასწრაფო დახმარების ექიმი იმ საავადმყოფოს ფანჯრიდან გადავარდა სადაც კორონავირუსზე მკურნალობდა. წინასწარი ინფორმაციით ექიმი ალექსანდრ შუპელოვოვი მძიმე მდგომარეობაშია და რეანიმაციაში იმყოფება.

როგორც რადიო თავისუფლების რუსული ბიურო წერს, აპრილის ბოლოს ალექსანდრ შუპელოვმა თავის კოლეგასთან ერთად გაავრცელა ვიდეო, რომელშიც ყვებოდა, რომ კორონავირუსის დიაგნოზის მიუხედავად მუშაობას აიძულებდნენ. ექიმი ასევე აცხადებდა, რომ მედიკოსებს თავდაცვის საშუალებებით არ ამარაგებენ და ტესტებსაც არ უტარებენ.

ამის შემდეგ ოლქის ჯანდაცვის დეპარტამენტმა შუპელოვის მორიგი ვიდეო გაავრცელა, სადაც ის უკვე ყვებოდა, რომ ძველი ვიდეომიმართვა "ემოციების დროს ჩაწერა".

საავადმყოფოს ფანჯრებიდან ექიმის გადავარდნის შესახებ ინფორმაცია რუსულ მედიაში აქამდეც გავრცელებულა. მედიაზონას ინფორმაციით, კრასნოიარსკის ოლქის ერთ-ერთი საავადმყოფოს მთავარი ექიმის მოვალეობის შემსრულებელი, ელენა ნეპომნასჩაია სატელეფონო კონფერენციის დროს ფანჯრიდან გადავარდა. კონფერენცია რეგიონის ჯანდაცვის სამინისტროს ხელმძღვანელთან მიმდინარეობდა.

როგორც ინფორმაცია ვრცელდებოდა, თავდაცვის საშუალებებისა და პერსონალის ნაკლებობის გამო ექიმი კორონავირუსით ინფიცირებული პაციენტების მიღების წინააღმდეგი იყო. ფანჯრიდან გადავარდნიდან ერთ კვირაში ქალი გარდაიცვალა.

გამოცემა Moscow Times ფანჯრიდან ექიმის გადავარდნის მესამე შემთხვევაზეც წერს. მათი თქმით, სასწრაფო დახმარების ექიმი ნატალია ლებედევა მოსკოვის საავადმყოფოს ფანჯრიდან გადავარდა, სადაც კორონავირუსის დიაგნოზით მკურნალობდა. ოფიციალური ორგანოები აცხადებენ, რომ ეს უბედური შემთხვევაა, თუმცა არაოფიციალური წყაროები აღნიშნავენ, რომ სავარაუდოდ ექიმმა თავი მოიკლა, რადგან კორონავირუსის გავრცელებაში ადანაშაუელებდნენ.