ავტომობილით, რომლის სალონშიც ყოფილი პრემიერმინისტრის, ბიძინა ივანიშვილის ფოტოს გამორჩეული ადგილი უკავია, პარლამენტის მაჟორიტარი დეპუტატი, ქართული ოცნების წევრი კობა ლურსმანაშვილი გადაადგილდება. ლურსმანაშვილი პარლამენტში ხარაგაულსა და ბაღდათს წარმოადგენს.

On.ge-მ აღნიშნული ავტომობილი 18 ნოემბერს, მე–9 მოწვევის პარლამენტის პირველი სხდომის დაწყებამდე, ქუთაისში, პარლამენტის შენობის წინ გადაიღო. ჩვენ ვესაუბრეთ კობა ლურსმანაშვილს, რომელმაც დაადასტურა, რომ BMW X5 სახელმწიფო ნომრით 051, სწორედ ის გადაადგილდება, თუმცა ავტომობილი მისი უახლოესი მეგობრის საკუთრებაა, რადგან თავად ავტომობილი არ ჰყავს. როგორც დეპუტატი ამბობს, ქონებრივ დეკლარაციაში მითითებული კია სპორტიჯი გაფუჭებულია და გადასაადგილებლად უვარგისია.

ლურსმანაშვილის თქმით, ის მეგობრის ავტომობილით წინასაარჩევნო პერიოდის შემდეგ გადაადგილდება:

"ჩვენი პარტიის დამფუძნებელს, ბატონ ბიძინა ივანიშვილს პატივს ვცემ და წინასაარჩევნოდ მანქანაში ჩამოვკიდე ივანიშვილის ლოგო და მერე შესაძლოა დავიტოვე, ეს ვინმეში რაიმე ცუდ ასოციაციებს იწვევს? რა არის ამაში ცუდი?

იცით რა მინდა გითხრათ? ბატონი ბიძინა ივანიშვილი არის ის პიროვნება, რომელმაც საქართველოს უახლოესი ისტორია შეცვალა. ჩვენ გვაქვს მეტი თავისუფლება, მეტი დემოკრატია და რაც მთავარია, ჩვენ მიგვაჩნია, რომ ამ პიროვნებამ საქართველოში თითოეული ადამიანისთვის უკეთესი ბედნიერების საფუძველი შექმნა. გამომდინარე აქედან, სრულიად ლოგიკურია, რომ ქართული ოცნების წევრებს გაგვაჩნდეს ასეთი სურვილი და ეს სრულებით არ არის გასაპროტესტებელი. ეს [ფოტო] თუ ინტერნეტში ხვდება, ძალიან კარგია. მე ვიტყოდი, რომ ყველას რომ ჩამოეკიდა ბატონი ბიძინას სურათი და პატივი ეცა ბატონი ბიძინასთვის საქართველოში ძალიან კარგი იქნებოდა. ნაციონალური მოძრაობისთვის ნახევარ მილიონს რომ არ მიეცა ხმა, ესეც იქნებოდა ძალიან დიდი ბედნიერების საფუძველი საქართველოსთვის და ჩემთვის".

ვინ არის კობა ლურსმანაშვილი?

კობა ლურსმანაშვილი 2016 წლის საარჩევნო კამპანიისას პარტიულ ლიდერებთან ერთად.

ფოტო: Facebook/Koba Lursmanashvili

ქართული ოცნების ვებგვერდზე გამოქვეყნებული ინფორმაციის მიხედვით, კობა ლურსმანაშვილი საერთაშორისო სამართლის სპეციალისტია. ის 1992-1994 წლებში იყო ცენტრალური ეროვნული თავდაცვითი საბჭოს წევრი, 1994–1996 წლებში მუშაობდა არასამთავრობო ორგანიზაციაში ადამიანის უფლებათა დაცვის ლიგა. სხვადასხვა წლებში მუშაობდა პარლამენტში უფროს სპეციალისტად, ხარაგაულის საკრებულოში არაერთხელ იყო არჩეული. 2001–2009 წლებში ის ეწეოდა სამეწარმეო საქმიანობას, 2009–2013 წლებში კი კერძო საადვოკატო საქმიანობით იყო დაკავებული.

კობა ლურსმანაშვილი ქართულ ოცნებას 2012 წელს შეუერთდა, 2013 წლის თებერვლიდან ბოლო დრომდე კი ხარაგაულის მუნიციპალიტეტის გამგებელი იყო.