შსს-ს ცნობით, ბოლო 24 საათში საგანგებო მდგომარეობის რეჟიმისა და ე.წ. კომენდანტის საათის შეზღუდვების დარღვევისთვის 103 პირი დააჯარიმეს. უწყება აცხადებს, რომ მათგან 78 მოქალაქე ე.წ. კომენდანტის საათის დარღვევისთვის დაჯარიმდა.

შსს-ს პრესსამსახური, ასევე, დაჯარიმებულთა დეტალურ სტატისტიკასაც აქვეყნებს, რომლის მიხედვით, საჯარო სივრცეში 3-ზე მეტი პირის შეკრების შეზღუდვისა და 2-მეტრიანი სოციალური დისტანციის დაუცველობის გამო, სულ 16 მოქალაქე დააჯარიმეს. ასევე, თვითიზოლაციის წესების დარღვევისთვის 5 პირი, ხოლო მგზავრთა გადაყვანისა და ავტომობილით გადაადგილების წესის დარღვევისთვის კიდევ 4 პირი დააჯარიმეს.

საგანგებო მდგომარეობის რეჟიმის დარღვევა იწვევს ადმინისტრაციულ პასუხისმგებლობას — ფიზიკური პირის დაჯარიმებას 3 000 ლარით, ხოლო იურიდიული პირის — 15 000 ლარით.