ბრიტანული გამოცემა The Guardian მიიჩნევს, რომ დონალდ ტრამპის აშშ–ს პრეზიდენტად არჩევის შემდეგ, მედიას "მძიმე დრო დაუდგა", რის გამოც მკითხველისგან გადარჩენისთვის დახმარებას ითხოვს.

დახმარებისკენ მოწოდება გარდიანის პირველივე გვერდზეა გამოქვეყნებული, სადაც წერია: "დაგვეხმარეთ, რათა გავუმკლავდეთ ახალ პრეზიდენტს, გავაძლიეროთ მათი ხმა, ვისიც საკმარისად არ ისმის, გავიგოთ, რა ძალა იდგა ამ საკამათო არჩევნების უკან და რა მოხდება შემდგომ".

ბრიტანული გამოცემა მკითხველს სთავაზობს, გახდეს მხარდამჭერი და გადაიხადოს წელიწადში $69, ან თვეში $6,99, სანაცვლოდ კი მიიღოს სრული წვდომა მედიასაშუალების სერვისებზე რეკლამის გარეშე. გარდა ამისა, მსურველებს შეუძლიათ ერთჯერადად გადარიცხონ ნებისმიერი ოდენობის თანხა.

გარდიანის ამერიკული რედაქციის რედაქტორმა, ლი გლენდაინინგმა პირველადი შედეგების გამოქვეყნებისთანავე, 9 ნოემბერს გაუგზავნა წერილი მედიასაშუალების ყველა ხელმომწერს.

გლენდაინინგი წერილში წერდა, რომ "აშშ–ს ისტორიაში ყველაზე საკამათო, შავ–ბნელი და საზიანო საარჩევნო კამპანიის შემდეგ, დონალდ ტრამპი გახდება აშშ–ს 45–ე პრეზიდენტი".

გარდიანის რედაქტორის თქმით, ხალხი ამერიკასა და მსოფლიოში, ტრამპის არჩევის გამო, შეშინებულია:

"სწორედ ამის გამო, მსოფლიოსთვის ისე არასდროს საჭირო არ ყოფილა დამოუკიდებელი მედია, როგორც ახლა. გარდიანს, თავისი საქმიანობით, ტრამპი და მისი ადმინისტრაცია მუდმივად ეყოლება ყურადღების ცენტრში და მოსთხოვს პასუხს. ჩვენ ვიბრძოლებთ, რათა გამოვამჟღავნოთ სიმართლე, თუ ხელისუფლება ეცდება ტყუილებით დაფაროს ის. ჩვენ გავაგრძელებთ ფაქტების სიყალბისგან გამორჩევას".

ლი გლენდაინინგი წერილს ასრულებს მოწოდებით, რომ სწორედ ამიტომ, "ახლა არის გარდიანის დახმარების დრო".