Twilight-ის ავტორი მსოფლიოს სიურპრიზს უმზადებს და ფანებს უკვე თეორიები აქვთ

შეიძლება არ იცით, ან დაგავიწყდათ, მაგრამ ამერიკელი მწერალი სტეფანი მეიერი მთელ მსოფლიოში ერთ-ერთი ყველაზე მეტად გაყიდვადი წიგნების სერიის ავტორია: CNN-ის ცნობით, ბინდის საგის სახელწოდებით ცნობილი წიგნების სერიის 100 მილიონზე მეტი ეგზემპლარია გაყიდული მსოფლიოში.

ფოტო: Amanda Edwards—WireImage/Getty Images

სტეფანი მეიერმა 2005 წლიდან 2008 წლამდე ბინდის საგის სახელით ოთხი წიგნი გამოაქვეყნა, რომელთა მიხედვითაც ცნობილი ეკრანიცაზიები გადაიღეს, სადაც კრისტენ სტიუარტი და რობერტ პატინსონი თამაშობენ.

გიყვართ თუ არა ეს ფილმები, ამ თინეიჯერი გოგოსა და ვამპირის სიყვარულის ისტორიის შესახებ აუცილებლად გეცოდინებათ.

ბინდის ბოლო წიგნი 2008 წელს გამოვიდა, ბოლო ეკრანიზაცია კი — 2012 წელს და ერთი შეხედვით, ის თითქოს ყველას მიავიწყდა, თუმცა, როგორც ჩანს, არც მთლად ასეა: ცოტა ხნის წინ სტეფანი მეიერმა თავის ოფიციალურ საიტზე ჯერ უცნობი მოვლენის ათვლა დაიწყო.

როგორც ხედავთ, დაახლოებით სამ დღეში ის თავის ერთგულ მკითხველებს ახალ ამბავს აცნობებს. თანაც ეს სიახლე არც ისე უმნიშვნელო უნდა იყოს, რადგანაც ასე პომპეზური ანონსით მიიპყრო ყურადღება.

სხვადასხვა ვარაუდებთან ერთად ფანები ერთ ვერსიად იმასაც განიხილავენ, რომ, შესაძლოა, მწერალმა ბინდის ახალი ნაწილი გამოაქვეყნოს.

ალბათ, არ იცით, რომ სტეფანი მეიერი ჯერ კიდევ წლების წინ წერდა საგის ახალ წიგნს Midnight Sun, თუმცა მას შემდეგ, რაც წიგნის შავი ვერსია 2008 წელს ინტერნეტში გავრცელდა, მწერალმა განაცხადა, რომ წერას აღარ დაასრულებდა და წიგნსაც აღარასდროს გამოაქვეყნებდა.

შესაბამისად, ახლა ადამიანების ერთი ნაწილი მოუთმენლად ელოდება დადასტურებას, რომ ავტორმა თავისი გადაწყვეტილება შეცვალა და ახალ დასრულებულ წიგნს გამოაქვეყნებს.

მეორე ნაწილი კი, ვისაც ეს საგა, რბილად რომ ვთქვათ, გულზე დიდად არ ეხატება, ალბათ, ნატრობს, რომ ეს ასე არ იყოს...