დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

დაავადებათა კონტროლის ეროვნული ცენტრის დირექტორის ინფორმაციით, იმ შემთხვევაში, თუ მომავალი ორი კვირის განმავლობაში ქვეყანაში კორონავირუსით ინფიცირებულთა რაოდენობა დღეში 20-ით, 30-ით ან 40-ით გაიზრდება, ეს ჯანდაცვის სისტემისთვის "სრულიად მართვადია".

გამყრელიძემ ჯანდაცვის სამინისტროში გამართულ პრესკონფერენციაზე განმარტა, რომ ყველა ქვეყნისთვის შიდა გავრცელების დაწყებიდან მე-6, მე-7, მე-8 კვირები არის ყველაზე საპასუხისმგებლო, საქართველოში შიდა გავრცელების თარიღად კი 22-23 მარტი ითვლება.

"მოვუწოდებ მოსახლეობას, რომ ყველა რეკომენდაცია, რასაც ჯანდაცვის სექტორი იძლევა, დაიცვან. მაშინ დარწმუნებული იყავით, რომ ჩვენი ქვეყანა გამოვა ამ ეპიდემიიდან შედარებით ნაკლები დაზიანებით", — თქვა გამყრელიძემ.

მისივე ინფორმაციით, დღევანდელ შეხვედრაზე ლაბორატორიული კვლევების კიდევ უფრო გაფართოება განიხილეს და ძირითადი აქცენტია მოლეკულურ კვლევებზე იყო. გამყრელიძის თქმით, ამ დროისთვის ყველაზე მეტი კვლევა ჩატარებულია დღეს, 30 აპრილს, 1096 ერთ დღეში. მან აღნიშნა, რომ ტესტირებები 12 ლაბორატორიაში ჩატარდა და მომავალი კვირიდან კიდევ სამი ლაბორატორია დაემატება.

NCDC-ის დირექტორი ამბობს, რომ გეგმაშია 15 მაისამდე ყოველდღიურად დაახლოებით 1500-1700 ტესტი გაკეთდეს, შემდეგ კი — 2000-2500.

"ეს აუცილებელია, როდესაც ხდება შემსუბუქება ე.წ. შეზღუდვითი ღონისძიებების. აუცილებელია, რომ უფრო ფართომასშტაბიანი და ფართო ხელმისაწვდომობა იყოს PCR კვლევებზე და მეორეს მხრივ, ჰოსპიტალური სისტემის და პირველადი ჯანდაცვის სისტემის სრული მზადყოფნა. აქეთკენ მიდის ახლა ქვეყანა. მე ვფიქრობ, რომ აქამდე გატარებულმა ზომებმა, ერთის მხრივ, შემზღუდავმა და მეორეს მხრივ, სამედიცინო ჯანდაცვითმა ღონისძიებებმა, მოგვიყვანა იქამდე, რომ დღეს ჩვენთან ინფექცია ჯერჯერობით ისევ დუნედ იზრდება. ანუ არ გვაქვს დიდი ნახტომისებური ზრდები", — თქვა გამყრელიძემ.

ამ დროის მონაცემებით, საქართველოში კორონავირუსის 539 დადასტურებული შემთხვევაა, მათ შორის გამოჯანმრთელებულია 178, ხოლო გარდაცვლილია 6 ადამიანი. კარანტინის რეჟიმში 5256 მოქალაქე იმყოფება, სტაციონარში მეთვალყურეობის ქვეშ კი — 548.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: