საპატრულო პოლიციის ყოფილი უფროსი, დავით ცინარიძეს პროკურატურამ ბრალი წარუდგინა. უწყების განცხადებაში ვკითხულობთ, რომ მას ბრალი ცოლის მიმართ განხორციელებული ძალადობის და მუქარის ფაქტზე წარედგინა.

"გამოძიებით დგინდება, რომ 2020 წლის 27 აპრილს, ღამის საათებში, ნასვამ მდგომარეობაში მყოფმა დ.ც.-მ ცოლს მ.ბ.-ს სიტყვიერი და ფიზიკური შეურაცხყოფა მიაყენა, შემდეგ კი ცეცხლსასროლი იარაღის გამოყენებით სიცოცხლის მოსპობით დაემუქრა, რა დროსაც ცეცხლსასროლი იარაღიდან ერთჯერადად გაისროლა", — წერია უწყების განცხადებაში.

უწყების ინფორმაციით, სამართალდამცველებმა პოლიციის ყოფილი უფროსი შემთხვევის ადგილზე 28 აპრილს დააკავეს. ბრალდების მხარემ საქალაქო სასამართლოს დავით ცინარიძესთვის აღკვეთის ღონისძიების სახით პატიმრობის შეფარდების შუამდგომლობით მიმართა. თბილისის საქალაქო სასამართლო აღკვეთი ღონისძიების საკითხზე 2020 წლის 30 აპრილს იმსჯელებს.

უწყების ცნობით, გამოძიება საქართველოს სისხლის სამართლის კოდექსის 11 პრიმა 151-ე მუხლის მე-2 ნაწილის "დ" ქვეპუნქტით და 126-ე პრიმა მუხლის პირველი ნაწილით მიმდინარეობს.