ჯანდაცვის მინისტრმა ეკატერინე ტიკარაძემ დაადასტურა, რომ ერთ-ერთ მიზნობრივ ჯგუფად იგეგმება ჟურნალისტების ტესტირებაც, თუმცა ეს ახალი ალგორითმის დამტკიცების შემდეგ ამოქმედდება. ამით მინისტრი ჟურნალისტების ტესტირების დაწყებაზე რესპუბლიკური საავადმყოფოს დირექტორის, ლევან გოფოძის განცხადებას გამოეხმაურა.

"რესპუბლიკური საავადმყოფო დამოუკიდებლად ვერ დაიწყებს ჟურნალისტების ტესტირებას, თუმცა ის ინიციატივა, რომელზეც ვისაუბრე, წამოწყებული იყო რესპუბლიკური საავადმყოფოს მხრიდან. დეტალებზე უკვე ვისაუბრეთ დაავადებათა კონტროლის ცენტრთან, შემუშავდება ახალი ალგორითმი და ამის დამტკიცების შემდეგ უკვე, რა თქმა უნდა, ესეც ამოქმედდება", — თქვა მინისტრმა.

რესპუბლიკური საავადმყოფოს დირექტორის, ლევან გოფოძის განცხადებით, ტესტირების მიზნობრივ ჯგუფებს შორის არიან ჟურნალისტებიც.

"გუშინვე განვაცხადე კლინიკური ჯგუფის შეხვედრაზე, რომ ჩვენ ჟურნალისტების გატესტვა დავიწყეთ-მეთქი, რადგან დარწმუნებული ვიყავი, რომ გუშინ თქვენ შებრძანდით და ტესტი გაიკეთეთ. რადგან ასე არ იყო, მაშინ დღეს ვიწყებთ ჟურნალისტების გატესტვას", — მიმართა გოფოძემ ჟურნალისტებს.

გუშინ, 28 აპრილს ჯანდაცვის მინისტრმა თქვა, რომ გაფართოვებული ტესტირების ფარგლებში ჩაერთვებიან მოწყვლადი ჯგუფებიც, მოხუცებულთა თავშესაფრები, სათემო პანსიონატები, სადაც არიან შშმ პირები, როგორც ბავშვები, ისე ზრდასრულები.