საპატრულო პოლიციის ყოფილი უფროსი, დავით ცინარიძე დააკავეს. ინფორმაცია 28 მარტს, საღამოს გახდა ცნობილი. შინაგან საქმეთა სამინისტროში On.ge-ს უთხრეს, რომ ცინარიძე ოჯახის წევრის მიმართ განხორციელებული მუქარის ბრალდებით არის დაკავებული.

უწყების ცნობით, გამოძიება სისხლის სამართლის კოდექსის 11 პრიმა 151-ე მუხლის მეორე ნაწილის დ ქვეპუნქტით მიმდინარეობს, რაც ოჯახის წევრის მიმართ განხორციელებულ მუქარას გულისხმობს.

დავით ცინარიძე 2015 წელს საპატრულო პოლიციის დეპარტამენტის უფროსის თანამდებობიდან გაათავისუფლეს და კადრების განყოფილებაში გადაიყვანეს. მანამდე ნაციონალურმა მოძრაობამ გაავრცელა ვიდეოკადრები, სადაც ჩანდა, რომ მოქალაქე ეკა ყუშიტაშვილი დავით ცინარიძის სახელის გამოყენებით პატრულზე ზეწოლას ცდილობდა. ამ ამბის შემდეგ ცინარიძემ სისტემაში მუშაობა გააგრძელა, თუმცა სხვა პოზიციაზე.